BMC Dia Mirza : दिवाळी हिंदू लोकांचा सण, दिया मिर्झाने सांगू नये, रितू तावडे भडकल्या; त्या व्हिडीओवरून वाद चिघळला!
दिया मिर्झाच्या व्हिडीओनंतर रितू तावडे यांनी पत्रकार परिषद घेऊन आपली भूमिका मांडली. यापुढे जाहिरातीसाठी कोणाला घ्यायचं, जाहिरातीत कोणता कलाकार असणार ते मी बघणार, असं रितू तावडे यांनी यावेळी स्पष्ट केलं.
BMC Dia Mirza Video Clash : मुंबई महापालिकेकडून पर्यावरणपुरक दिवाळी साजरी करण्याचे आवाहन केले जातेय. त्यासाठी अनेक सिनेकलाकार आणि सेलिब्रिटींची मदत घेतली जातेय. अभिनेत्री दिया मिर्झानेही पर्यावरणपुरक दिवाळी साजरा करण्याचे आवाहन केले होते. तिचा एक व्हिडीओ मुंबई पालिकेने सोशल मीडियावर पोस्ट केला होता. परंतु तिच्या या व्हिडीओनंतर मोठा वाद झालाय. मुंबई भाजपाचे अध्यक्ष अमित साटम यांनी दिया मिर्झाने आम्हाला दिवाळी कशी साजरी करावी, हे शिकवण्याची गरज नाही, असं म्हणत तिच्या आवाहनावर आक्षेप घेतलाय. त्यानंतर दिया मिर्जाचा व्हिडीओ सोशल मीडियावरून डिलीट करण्यात आलाय. असे असतानाच आता मुंबईच्या महापौर रितू तावडे यांनीही आपली भूमिका मांडली आहे. आमचा दिया मिर्झाला कायम विरोध असेल. दिया मिर्झान नेहमी हिंदूविरोध भूमिका घेते, असे तावडे म्हणाल्यात.
देशविरोधी कारवाईला हात मिळवणी करण्याचं दियाचं काम
दिया मिर्झाच्या व्हिडीओनंतर रितू तावडे यांनी पत्रकार परिषद घेऊन आपली भूमिका मांडली. यापुढे जाहिरातीसाठी कोणाला घ्यायचं, जाहिरातीत कोणता कलाकार असणार ते मी बघणार, असं रितू तावडे यांनी यावेळी स्पष्ट केलं. दिया मिर्झा या पहिल्यांदाच वादग्रस्त ठरलेल्या नाहीत. त्यांनी देशविरोधी कारवाईला हात मिळवणी करण्याचं काम केलंय. आपल्या देशाचे पंतप्रधान नरेंद्र मोदी यांच्या विकासाला खोडून काढण्याचं काम दिया मिर्झा यांनी केलंय. त्यामुळे त्यांनी हिंदू सणाच्या बाबतीत शिकवू नये. दिया मिर्झाने आम्हाला शिकवू नये, अशी रोखठोक भूमिका दिया मिर्झाने घेतलीय.
दिया मिर्झाने शिकवणं आम्हाला मान्य नाही
हिंदू लोकांनी कशी दिवाळी साजरी करायची हे दिया मिर्झाने सांगू नये. हवेची गुणवत्ता खालावतेय. त्यामुळे जनजागृतीसाठी कलाकारांची मदत घ्या, असे उच्च न्यायालयाने सांगितले होते. कलाकारांची निवड करण्याआधी पालिकेच्या जनसंपर्क विभगाने आम्हाला दाखवायला हवे होते. दिवाळी हा हिंदू लोकांच सण आहे. दिया मिर्झाने शिकवणं हे आम्हाला मान्य नाही. हिंदू विरोधी संस्थांना कायम त्यांनी पाठिंबा दिलेला आहे, असा गंभीर आरोपही त्यांनी केलाय.
दिया मिर्झाची काय प्रतिक्रिया आली?
मी याबाबत पालिका आयुक्तांकडून खुलासा घेणार आहे. जन जागृती करताय, पण कोणत्या कलाकारांना घेणार त्याची यादी माझ्याकडे यायला पाहिजे. हिंदुत्ववादाचा आमचा अजेंडा आहे, असेही पुढे त्यांनी स्पष्ट केले. दरम्यान, महापालिकेने व्हिडीओ हटवल्यानंतर दिया मिर्झाने प्रतिक्रिया दिलीय. मी त्या व्हिडीओसाठी एक रुपयाही घेतलेला नाही. चांगले काम करण्याचे दिवस राहिले नाहीत, असे दिया मिर्झा म्हणाली.
