Rupali Chakankar : बाई एवढी माया आली कुठून, 35 कोटी रुपये..रुपाली चाकणकर यांच्या पुण्यातील The Nines हॉटेलवर काँग्रेस नेत्याचा सवाल

राज्य महिला आयोगाच्या माजी अध्यक्षा रूपाली चाकणकर यांनी हॉटेल व्यवसायात पर्दापण केलं आहे. पुण्यात द नाईन्स नावाने त्यांनी एक बार आणि रेस्टॉरंट सुरू केलं आहे. या हॉटेलच्या उद्घाटन सोहळ्याला माजी मंत्री जयंत पाटील, आमदार सुनील शेळके यांच्यासह राजकीय आणि सामाजिक क्षेत्रातील प्रमुख व्यक्ती उपस्थित होत्या. यात राष्ट्रवादी काँग्रेस शरद पवार यांच्या पक्षाचे आमदार जयंत पाटील यांच्या उपस्थितीमुळे राजकीय चर्चाना उधाण आलय. दोन दिवसांपूर्वी त्यांनी कल्याणीनगर मधील पॉश भागात The Nines या नावाने हॉटेल सुरू केलं आहे.

मात्र या हॉटेलचं उद्घाटन झाल्यानंतर काँग्रेस नेत्या संगीता तिवारी यांनी सोशल मीडियावर पोस्ट करत रुपाली चाकणकर यांच्यावर टीकेची झोड उठवली आहे. “The Nines” या नव्या हॉटेलचा उद्घाटन सोहळा. हे कल्याणी नगर मधील प्रचंड मोठे रेस्टॉरंट 20000 स्क्वेअर फिट मध्ये बांधले आहे. 35 करोड रुपये आजची किंमतआहे. महिला आयोगाच्या माजी अध्यक्ष रुपाली निलेश चाकणकर यांना सामान्य नागरिकाचा एकच प्रश्न?? बाई एवढी माया आली कुठून, एवढा पैसा करोडोंच्या घरातला कसा कधी मिळविला जरा आम्हाला सांगा ना बाई.वा वा छान राजकारणी दिसतायेत तिथे” असं संगीता तिवारी यांनी त्यांच्या पोस्टमध्ये म्हटलं आहे.

इमेजला मोठा फटका बसला

भोंदूबाबा अशोक खरात प्रकरणामुळे रुपाली चाकणकर यांच्या इमेजला मोठा फटका बसला आहे. राजकारणात त्यांना मोठा धक्का बसला. रुपाली चाकणकर यांना राज्य महिला आयोगाचं अध्यक्षपद तसचं राष्ट्रवादी काँग्रेस महिला प्रदेशाध्यक्षपद गमवावं लागलं. त्यांचे अशोक खरात सोबतचे सार्वजनिक कार्यक्रमातले फोटो समोर आले होते. हा भोंदूबाबा अशोक खरात सध्या तुरुंगाची हवा खात आहे. त्याच्यावर अनेक महिलांची फसवणूक केल्याचा आरोप आहे. अशोक खरातवर अनेक महिलांचं लैंगिक शोषण केल्याचा आरोप आहे.

कायदेशीर पावलं उचलली

दरम्यान या प्रकरणात रुपाली चाकणकर यांनी कायदेशीर पावलं उचलली आहेत. रुपाली चाकणकर यांची बदनामी केल्याप्रकरणी 19 जणांवर गुन्हा दाखल करण्यात आला आहे. रुपाली ठोंबरे, सुषमा अंधारे यांनी रुपाली चाकणकर यांच्यावर अनेक आरोप केले होते.