सर्वात मोठी बातमी! मी पक्ष सोडलाच नाही, सचिन अहिर यांचे धक्कादायक विधान; नेमकं काय म्हणाले?

Sachin Ahir Join Eknath Shinde Shivsena : उद्धव ठाकरे यांच्या सहा खासदारांनी बंडखोरी करून एकनाथ शिंदे यांच्या पक्षात प्रवेश केला. त्यानंतर आता ठाकरेंना आणखी एक जबर धक्का बसला आहे. ठाकरे कुटुंबाचे विश्वासू मानले जाणारे सचिन अहिर यांनी उद्धव ठाकरेंची साथ सोडली आहे. त्यांना शिंदे गटाकडून लवकरच विधानपरिषदेचं उपसभापतीपद दिलं जाणार आहे. शिंदे यांनी पत्रकार परिषद घेऊन याबाबत घोषणा केली. दरम्यान, सचिन अहिर हे यापुढे एकनाथ शिंदे यांच्या पक्षाचे काम करणार आहेत. शिंदे यांची शिवसेना पुणे, मुंबई तसेच संपूर्ण महाराष्ट्रात कशी वाढेल, यासाठी मी प्रयत्न करणार असल्याचे अहिर यांनी जाहीरपणे सांगितले आहे. अहिर यांनी उपमुख्यमंत्री एकनाथ शिंदे यांच्या बाजूला बसून याबाबतची घोषणा केलेली आहे. तसेच मी पक्ष सोडलाच नाही, असं आश्चर्यकारक विधान केलंय. विशेष म्हणजे अहिर यांच्या या विधानानंतर एकनाथ शिंदे यांनीदेखील केलेल्या विधानानंतर वेगवेगळ्या चर्चांना उधाण आलं आहे. याआधी ठाकरे यांच्या पक्षाचे काम करणाऱ्या अहिर यांनी पक्ष सोडला नसेल तर मग ते शिंदे यांच्या पक्षाचे काम कसे करणार? असा प्रश्न विचारला जात आहे.

पत्रकार परिषदेत नेमकं काय घडलं?

पत्रकार परिषदेत सचिन अहिर यांनी वेगवेगळ्या प्रश्नांची उत्तरं दिली. मी पक्ष सोडला नाही. तांत्रिक मुद्द्यावर वेगळ्या व्यासपीठावर बोलू. मला उपसभापतीपदाची जबाबदारी दिलेली आहे. हा माझा बहुमानच आहे. या पदाचा मान टेवून मी भविष्यात काम करणार आहे, असे सचिन अहिर म्हणाले आहेत. तसेच पुढे बोलताना, बाळासाहेब ठाकरे यांचा विचार घेऊन शिंदे काम करत आहेत. एकनाथ शिंदे हे आकर्षण आहेत. खासगीत अनेक लोकप्रतिनिधींना विचारा ते याबाबत सांगतील. असा नेता आम्हाला साथ देणार असेल तर काम करता येते, अशी प्रतिक्रियाही त्यांनी दिली. तसेच काही लोकांनी आयुष्यात कधी दगड उचलला नाही ते आम्हला शिकवायला लागले तर कसं व्हायचं, असा टोलाही त्यांनी ठाकरेंना लगावला.

आम्हीच त्यांना मतदान केलं

अहिर यांच्या मी पक्ष सोडलेला नाही, या विधानावर नंतर एकनाथ शिंदे यांनीही भाष्य केले. ते जेव्हा आमदार झाले, तेव्हा आम्ही त्यांना मतदान केलेलं होतं. ते आमदार झाले तेव्हा शिवसेना पक्ष आणि धनुष्यबाण हे निवडणूक चिन्ह आमच्याकडे होता. आजही शिवसेना पक्ष आणि धनुष्यबाण हे निवडणूक चिन्ह आमच्याकडेच आहे. त्यामुळे त्यांनी शिवसेना पक्ष सोडला वगैरे म्हणता येणार नाही, असा तांत्रिक मुद्दा एकनाथ शिंदे यांनी समजावून सांगितला. दरम्यान, आता सचिन अहिर यांची आमदारकी जाणार का? ठाकरे गटाकडून काय पावलं उचलली जाणार? हे पाहणं महत्त्वाचं ठरणार आहे.