अजित पवार यांना झटका, भाजप, मनसेसह सर्व पक्षांचा बापू भेगडे यांना पाठिंबा

मावळ पॅटर्नला राज ठाकरेंचा पाठिंबा मिळाला आहे. बाळा भेगडे यांनी राज ठाकरे यांची भेट घेतली होती. त्यामुळे मावळ पॅटर्नला राज ठाकरेंनी ही पाठिंबा दर्शवलाय. हा पॅटर्न सत्यात उतरवण्यासाठी भाजपचे नेते बाळा भेगडेंनी स्वतः राज ठाकरेंची भेट घेतली होती. अजित पवारांचे शिलेदार सुनील शेळके यांच्या पराभवासाठी बाळा भेगडे मैदानात उतरलेत. शरद पवार गटासह सर्व पक्षीयांनी बापू भेगडेंना पाठिंबा दर्शवला आहे. त्यामुळं शेळकेंच्या अडचणीत दिवसेंदिवस वाढ होत चाललीये.

मावळचे बंडखोर बापू भेगडे यांना आज मनसेने अधिकृतरित्या पाठिंबा दर्शवलाय. महायुतीने सुनील शेळकेंना उमेदवारी दिल्यानंतर सर्वात आधी भाजप, मग शरद पवार गट त्यापाठोपाठ काँग्रेस, ठाकरे गट आणि आता मनसे ही बापू भेगडे यांच्या पाठीशी उभी राहिली आहे.

अर्ज मागे घेण्याच्या मुदतीनंतर अनेक मतदारसंघांत बंडखोरी कायम असल्याचं दिसून आलं. मविआ आणि महायुतीच्या नेत्यांनी अनेक इच्छुकांची समजूत काढत त्यांचा उमेदवारी अर्ज मागे घेतला. पण अनेक ठिकाणी बंडखोरी कायम राहिली.

मावळ मतदारसंघ हा अजित पवारांच्या राष्ट्रावादीला सुटला होता. पण उमेदवारी न मिळाल्याने राष्ट्रवादीचे प्रदेश उपाध्यक्ष बापू भेगडे यांनी पक्षाचा राजीनामा दिला होता आणि अपक्ष उमेदवारी दाखल केली होती. बापू भेगडे यांना आता मनसेने देखील पाठिंबा दिल्याने अजित पवार गटात खळबळ उडाली आहे.

अजित पवार गटाकडून सुनील शेळके मैदानात आहेत. त्यांच्या विरोधात भेगडे यांना अर्ज भरला. त्यानंतर आज पाठिंबा देण्याचे आदेश राज ठाकरे यांनी काढले आहेत. मनसे जाहीर पाठिंबा देत असून मावळमधील पदाधिकारी, कार्यकर्त्यांनी याची नोंद घ्यावी असे या पत्रकात म्हटले आहे.

सुनील शेळके यांच्या उमेदवारीला मावळमधील भाजपाच्या नेत्यांचा देखील विरोध होता. त्यामुळे भेगडे यांना भाजपच्या लोकांनी ही पाठिंबा दिला आहे. आता अजित पवार यांच्या उमेदवाराविरोधात भाजप, शरद पवार गट, ठाकरे गट आणि मनसे उभी ठाकणार आहे.