अभिमान वाटावा असंच… नीटमध्ये महाराष्ट्राची कन्या मुलींमध्ये देशात पहिली, कोण आहे श्रावणी कुदळे?

नीट पेपरफुटी प्रकरणाने महाराष्ट्राची देशभर बदनामी झाली. पेपर फुटल्याने अनेक विद्यार्थी खचले. पण राज्यावरील बदनामीचा हा डाग महाराष्ट्रातील लेकींनीच धुवून काढला आहे. परवा नीट परीक्षेचा निकाल लागला. नीट परीक्षेत महाराष्ट्राची लेक श्रावणी कृष्णा कुदळे ही मुलींमध्ये देशात आणि महाराष्ट्रात पहिली आली आहे. श्रावणीच्या या घसघशीत यशावर तिचं सर्वच स्तरातून कौतुक केलं जात आहे. खुद्द ज्येष्ठ नेते शरद पवार यांनी श्रावणीचं अभिनंदन करून तिचा सत्कार केला आहे.

श्रावणी कुदळे नीट परीक्षेमध्ये देशात पाचवी तर मुलींमध्ये पहिली आली आहे. तसेच महाराष्ट्रात नीट परीक्षेत पहिली येण्याचा मानही तिने पटकावला आहे. पहिल्याच प्रयत्नात श्रावणी कुदळने हे घवघवीत यश संपादन केल्याने तिचे आई-वडील देखील आनंदी आहेत. जिल्हा परिषदेच्या शाळेमध्ये कृष्णा कुदळे आणि जयश्री कुदळे हे शिक्षक आहेत. मुलगी इतकं मोठं यश संपादन करेल, असं वाटलं नव्हतं, अशी प्रतिक्रिया श्रावणीची आई जयश्री आणि वडील कृष्णा कुदळे यांनी दिली आहे. तिने यश संपादन केलं त्याचं कौतुक तिच्या आई-वडिलांना आहे.

बायोलॉजीत पैकीच्या पैकी

श्रावणीने नीट परीक्षेत 720 पैकी तिने 710 मार्क मिळवले आहेत. बायोलॉजीमध्ये तिने पैकीच्या पैकी म्हणजे 360 पैकी 360 मार्क मिळवले आहेत. तर केमिस्ट्रीमध्ये 180 पैकी 175 तर फिजिक्स 180 पैकी 175 मार्क मिळवले आहेत.

कोण आहे श्रावणी?

श्रावणी कुदळे ही बारामतीची आहे. श्रावणी ही पुण्यातील दौंड तालुक्यातील खडकी गावची आहे. श्रावणीचे वडील कृष्णा कुदळे आणि आई जयश्री कुदळे दोघेही जिल्हा परिषद शाळेत शिक्षक आहेत. श्रावणीचे प्राथमिक शिक्षण दौंडच्या गोपाळवाडी चोरमले वस्तीतील जिल्हा परिषदेच्या शाळेत झालं. तर माध्यमिक शिक्षण माळेगावच्या शारदाबाई पवार प्राथमिक शाळेत झालं. नंतर तिने माळेगावच्याच शारदाबाई पवार विद्यानिकेतनमध्ये हायस्कूलच तर लडकत स्कूलमध्ये अकरावी तसेच बारावीचं शिक्षण घेतलं.

सुनेत्रा पवारांचा व्हिडीओ कॉल

दरम्यान, श्रावणी कृष्णा कुदळे हिने 720 पैकी 710 गुण मिळवत महाराष्ट्रात प्रथम क्रमांक पटकावला. तसेच संपूर्ण भारतात मुलींमध्ये प्रथम येत बारामतीच्या शिरपेचात मानाचा तुरा रोवला. या उल्लेखनीय यशाबद्दल महाराष्ट्राच्या उपमुख्यमंत्री सुनेत्रा पवार यांनी श्रावणी कुदळे हिच्याशी व्हिडिओ कॉलद्वारे संवाद साधत तिचे मनःपूर्वक अभिनंदन केले. तसेच पुढील शैक्षणिक वाटचालीसाठी श्रावणीला शुभेच्छा दिल्या.

यावेळी सुनेत्रा पवार यांनी श्रावणीच्या यशामागे मोलाचे योगदान देणाऱ्या तिच्या शिक्षकांचेही अभिनंदन केले. तसेच, “दिवंगत लोकनेते अजितदादा पवार आज आपल्यात असते, तर त्यांनाही तुझ्या या यशाचा खूप अभिमान वाटला असता. त्यांचे आशीर्वाद सदैव तुझ्यासोबत आहेत,” अशी भावनाही सुनेत्रा पवार यांनी व्यक्त केली.

गुणवत्तेवर विश्वास ठेवून

दरम्यान, आमदार रोहित पवार यांनीही श्रावणीचं अभिनंदन केलं आहे. पेपरफुटीसारख्या अनेक अडथळ्यांवर मात करत अखेर नीट परीक्षेत बारामतीची श्रावणी कुदळे हिने मुलींमध्ये देशात प्रथम येण्याचा बहुमान पटकावला. तिचं हे यश प्रेरणादायी असून या दैदिप्यमान यशाबद्दल तिचं मनःपूर्वक अभिनंदन आणि पुढील वाटचालीसाठी खूप खूप शुभेच्छा! तसंच, मुलगी आणि मुलगा असा कोणताही भेदभाव न करता श्रावणीच्या गुणवत्तेवर विश्वास ठेवून तिच्या शिक्षणासाठी सातत्याने प्रोत्साहन, पाठबळ आणि मोलाची साथ दिल्याबद्दल तिचे वडील कृष्णा कुदळे आणि आई जयश्री कुदळे यांचेही मनःपूर्वक अभिनंदन, असं रोहित पवार यांनी मह्टलंय.