तुकाराम मुंढे यांची धडाकेबाज कारवाई; FDA च्या अधिकाऱ्यांनी नामांकित बेकरीला ठोकले टाळे

सुनील जाधव : कल्याणमधील नामांकित बेकरीवर अन्न व औषध प्रशासनाने मोठी कारवाई केली. विभागाच्या अधिकाऱ्यांनी थेट बेकरी सील केली आहे. लाकडाची भट्टी वापरून पाव निर्मिती होत असल्याची तक्रार होती. या भट्टीमुळे परिसरात मोठ्या प्रमाणात धूर आणि प्रदूषण होत असल्याची तक्रार नागरिकांनी केली होती. मुंबई उच्च न्यायालयाच्या निर्देशानुसार बेकरींना एलपीजी, पाईप गॅस किंवा इलेक्ट्रिक ओव्हनचा वापर करणे बंधनकारक आहे. त्यानंतरही भट्टी मालकांकडून नियमांचे उल्लंघन झाल्याचे आढळून आल्याने एफडीएने कारवाई केली.

मिळालेल्या माहितीनुसार, कल्याणमधील नामांकित प्रिन्स बेकरीवर एफडीएने कारवाई करत बेकरी सील केली. पाव तयार करण्यासाठी लाकडाची भट्टी वापरली जात असल्याची तक्रार प्रशासनाकडे करण्यात आली होती. या भट्टीतून निघणाऱ्या धूरामुळे परिसरातील नागरिकांना त्रास होत असून प्रदूषण वाढत असल्याचीही तक्रार होती. मुंबई उच्च न्यायालयाच्या निर्देशानुसार राज्यातील बेकरींना लाकूड आणि कोळशाच्या भट्ट्यांऐवजी एलपीजी, पाईप गॅस किंवा इलेक्ट्रिक ओव्हनचा वापर करणे बंधनकारक आहे. त्यानंतर तपासादरम्यान नियमांचे उल्लंघन झाल्याचे निदर्शनास आल्यानंतर एफडीएने बेकरीला टाळे ठोकले. या कारवाईमुळे शहरातील इतर बेकरी व्यावसायिकांमध्येही नियमपालनाबाबत चर्चा सुरू झाली आहे.

बेकरी कर्मचारी नसीम खान यांनी म्हटलं की, लाकूड, कोळशाचा वापर केला जात असल्याने भट्टी सील केली. बाकीच्या भट्टी चालू आहेत. भट्टीमध्ये इंधन म्हणून लाकडाचा वापर केला जात होता. त्यामुळे कारवाई केली. नोटीस पाठवलेली नाही. आम्ही आता नोटीसची वाट पाहत आहोत. प्रिन्स नावाची बेकरी सील केली आहे’. अन्न व औषध प्रशासनाच्या कारवाईने परिरात खळबळ उडाली आहे.

चेंबूरमधील बेकरीवरही धाड

तत्पूर्वी, काही दिवसांपूर्वी चेंबूरमधील नामांकित अशफाक बेकरीवर अन्न व औषध विभागाने कारवाई केली. अन्न सुरक्षा आणि स्वच्छता निकषांचा उल्लंघन केल्याप्रकरणी परवाना निलंबनाची कारवाई प्रलंबित आहे. चेंबूरमधील सम्राट अशोक नगर, आर.सी. मार्ग या भागातील या बेकरीची विभागाच्या अधिकाऱ्यांकडून तपासणी करण्यात आली. त्यावेळी अहवालानुसार, बेकरीला 156 गुणांपैकी 56 गुण हे मिळाले. या निकालानुसार, नियमांचे पूर्णपणे उल्लंघन झाल्याचे नोंदवण्यात आले.