शिवाजी महाराजांनी सुरत लुटली, सुरत महाराष्ट्र का लुटत आहे?; उद्धव ठाकरे यांचा सवाल

गुजरातच्या सुरत लोकसभा मतदारसंघात भाजपचा पहिला विजय झाला आहे. या निवडणुकीत भाजपचा उमेदवार बिनविरोध निवडून आला आहे. त्यावरून माजी मुख्यमंत्री उद्धव ठाकरे यांनी भाजपवर जोरदार हल्ला चढवला आहे. गद्दारांना सुरत सुरक्षित का वाटली? ज्या शिवाजी महाराजांनी सुरत लुटली. ती सुरत महाराष्ट्र का लुटत आहे? असा सवाल उद्धव ठाकरे यांनी केला. उद्धव ठाकरे हे नांदेडमध्ये आले होते. मात्र, वेळेच्या अभावी त्यांनी सभा घेण्याऐवजी पत्रकार परिषद घेतली. यावेळी त्यांनी भाजप आणि माजी मुख्यमंत्री अशोक चव्हाण यांच्यावर जोरदार हल्ला चढवला.

अशोक चव्हाण भाजपमध्ये गेल्यानंतर नवीन चेहरे पुढे येत आहेत. त्यांनी ज्यांची वाट अडवणू ठेवली होती, त्यांना आता संधी मिळत आहे. आमच्याकडेही काही सुभेदाऱ्या निर्माण झाल्या होत्या. ते गेले आणि नवीन लोकांना संधी मिळाली. तसंच अशोक चव्हाण तिकडे गेल्याने काँग्रेसला नवचैतन्य निर्माण झालं आहे. नेते मोठे झाले की केले तरी जनता कधीच गद्दार होत नाही, असं उद्धव ठाकरे म्हणाले.

आदर्श घोटाळ्याचा निकाल अजूनही लागला नाही. त्यांनी अशोक चव्हाणांना भाजपमध्ये घेतलं आणि त्यांना राज्यसभेत पाठवलं. चव्हाण यांनी शहीदांच्या कुटुंबाला फसवलं असं तुम्ही तेव्हा म्हणत होता. याचा अर्थ तुम्ही शहिदांना फसवणाऱ्या लोकांमध्ये सामील झाला आहात, असा टोला त्यांनी लगावला.

आलेली स्क्रिप्ट वाचतात

यावेळी त्यांनी मुख्यमंत्री एकनाथ शिंदे यांच्यावर प्रतिक्रिया देणं टाळलं. मी घटनाबाह्य लोकांवर बोलत नाही. त्यांना सकाळी स्क्रिप्ट येते, ते कण्हून कण्हून बोलतात. कुंथून कुंथून बोलतात. लोकं त्यांना काय म्हणत आहेत ते जनतेत गेल्यावर कळतं, असा टोला त्यांनी लगावला.

घरकाम करणाऱ्यांनाही सुरक्षा

पार्थ पवार यांच्या सुरक्षेवरूनही त्यांनी जोरदार टीका केली. घरात काम करणाऱ्यांना या सरकारने झेड प्लस, वाय प्लस सुरक्षा दिली आहे. सर्व सामान्यांची सुरक्षा वाऱ्यावर पडली आहे. महिला सुरक्षित नाहीत. सलमानच्या घरावर गोळीबार होतोय. त्यांचा आमदार गणपत गायकवाड पोलीस स्टेशनमध्ये गोळीबार करत आहे. लोकांची सुरक्षा वाऱ्यावर आहे. पण गद्दारांना कडेकोट बंदोबस्तात ठेवत आहेत. सुरक्षेचा खर्च कोण करतंय हा प्रश्न आहे. लोकांचा कर घेऊन सुरक्षा दिली जात आहे, असा हल्लाही त्यांनी चढवला.