मी देव आहे म्हणत पुण्याच्या महिलेचे शोषण, नंतर तिच्या पतीला बोलवून… वसईचा भोंदूबाबा ऋषिकेश वैद्यचा आणखी एक कांड समोर

सध्या राज्यात नाशिकमधील भोंदू बाबा अशोक खरात प्रकरणामुळे खळबळ उडाली आहेत. त्यातच आता दुसरीकडे भक्ती आणि श्रद्धेचा गैरफायदा घेऊन महिलांचे शोषण करणाऱ्या भोंदू बाबांचे पेव फुटले असून वसईतून अशीच एक संतापजनक घटना समोर आली आहे. पुण्यातील एका महिलेला जाळ्यात ओढून स्वतःला साक्षात महादेवाचा अवतार सांगणाऱ्या ऋषिकेश वैद्य नावाच्या भोंदू बाबाने तिच्यावर अत्याचार केल्याची घटना उघड झाली होती. या घटनेनंतर आता ऋषिकेश वैद्य या भोंदूबाबाचा आणखी एक प्रताप समोर आला आहे. या भोंदू बाबाने पीडितेच्या पतीला आणि चिमुकल्या मुलाला जीवे मारण्याची धमकी दिल्याची माहिती समोर आली आहे.

नेमकी घटना काय?

आरोपी ऋषिकेश वैद्य हा काही काळापासून पीडित महिलेच्या संपर्कात होता. त्याने आपल्या बोलण्यातून आणि अघोरी विचारांतून आपण देवाचा अवतार असल्याचे भासवले. त्यानंतर त्याने महिलेचा विश्वास संपादन केला. या विश्वासाचा फायदा घेत त्याने पीडितेवर लैंगिक अत्याचार केले. इतकेच नव्हे तर, पीडिता यातून बाहेर पडण्याचा प्रयत्न करत असताना तिला विविध प्रकारे ब्लॅकमेल करून वारंवार भेटीसाठी बोलावण्यात आले. हा सर्व प्रकार पीडितेच्या पतीला समजला. त्यानंतर पीडितेच्या पतीने ऋषिकेश वैद्यला फोन करुन जाब विचारला.

पीडितेच्या पतीने या सततच्या फोन कॉलचा जाब विचारला तेव्हा आरोपीने त्यांना चर्चेसाठी २९ ऑक्टोबर २०२५ रोजी वसईतील हयात बंगल्यात बोलावले. तिथे गेल्यावर कोणताही पश्चात्ताप व्यक्त करण्याऐवजी आरोपीने पीडितेच्या पतीलाच धमकावले. जर तू पोलिसात गेलास किंवा हा प्रकार कुणाला सांगितलास, तर तुला आणि तुझ्या मुलाला मी संपवून टाकीन, अशी धमकी त्याने दिली.

पोलिसांकडून सखोल तपास सुरु

यानंतरही पीडितेच्या पतीने या दहशतीला न घाबरता वसई पोलीस ठाण्यात धाव घेतली. सुरुवातीला पोलिसांनी या घटनेची गांभीर्याने दखल घेत अदखलपात्र (NC) गुन्हा नोंदवला होता. मात्र तक्रारीतील तथ्य आणि धमकीचे स्वरूप पाहता आरोपी ऋषिकेश वैद्य याच्यावर भारतीय न्याय संहिता (BNS) कलम ३५२ (शांतता भंग करण्याच्या उद्देशाने केलेला अपमान) आणि ३५१(२) (गुन्हेगारी धमकी) अन्वये गुन्हा दाखल केला आहे. या प्रकरणात आता पोलीस सखोल तपास करत आहेत. या भोंदू बाबाने अशाच प्रकारे इतरही महिलांची फसवणूक केली आहे का, याची चौकशी सुरू आहे.