Dharmendra Pradhan : दिल्ली पोलीस हाय अलर्टवर, धर्मेंद्र प्रधान यांच्या घराकडे जाणारे रस्ते बंद

कॉकरोच जनता पार्टीच्या आंदोलनामुळे दिल्लीतील वातावरण चांगलचं तापलं आहे. आज सीजेपीच्या आंदोलनाचा चौथा दिवस आहे. दिल्ली पोलीस हाय अलर्टवर आहेत. नीट परीक्षेचा पेपर फुटला. त्यामुळे लाखो विद्यार्थ्यांना त्रास सहन करावा लागला. यासाठी केंद्रीय शिक्षण मंत्री धर्मेंद्र प्रधान यांना जबाबदार ठरवून त्यांचा राजीनामा घ्यावा या मागणीसाठी हे आंदोलन सुरु आहे. सोमवारी या आंदोलकांनी दिल्लीत संसद भवनावर मार्च काढला होता. हे आंदोलक संसद भवनाच्या जवळ पोहोचले होते. पण त्यांना संसदेपासून 150 मीटर अंतरावर रोखण्यात आलं. यावेळी मोठा राडा झाला. पोलीस आणि आंदोलकांमध्ये हिंसक झडपा झाल्या. त्यात विद्यार्थी आणि पोलीस जखमी झाले.

काल रात्री जंतर-मंतर परिसरात झालेल्या राड्यामुळे वातावरणात तणाव आहे. आंदोलनात सहभागी झालेल्या काही लोकांनी रॅपिड अॅक्शन फोर्स आणि पोलिसांवर दगडफेक केली. यात दोन सहाय्यक पोलीस आयुक्त (ACP) आणि तीन पोलिस कर्मचारी जखमी झाले आहेत. या सगळ्या परिस्थितीच्या पार्श्वभूमीवर केंद्रीय शिक्षण मंत्री धर्मेंद्र प्रधान यांच्या घराबाहेर सुरक्षा बंदोबस्त वाढवला आहे. प्रधान यांच्या घराकडे जाणारे रस्ते बंद केले आहेत. दिल्ली पोलीस हाय-अलर्टवर आहेत.

इन्स्टाग्राम खाते बंद

एकीकडे हे आंदोलन सुरू असतानाच अचानक धर्मेंद्र प्रधान यांची मुलगी निमिषा प्रधान यांना ट्रोल करण्यात येत आहे. त्यांनी परदेशात कायद्याचे शिक्षण घेतल्याने त्यांना लक्ष्य करण्यात येत आहे. याच ट्रोलिंगमुळे आता निमिषा प्रधान यांनी मोठा निर्णय घेतला आहे. धर्मेंद्र प्रधान यांच्या मुलीने आपले इन्स्टाग्राम खाते बंद केले आहे. म्हणजे धर्मेंद्र प्रधान यांच्यासोबत त्यांच्या कुटुंबालाही लक्ष्य करण्यात येत आहे. या पार्श्वभूमीवर दिल्ली पोलिसांनी खबरदारी म्हणून काही पावलं उचलली आहेत. सीजेपीच्या आंदोलनामुळे आजही दिल्लीतील 16 मेट्रो स्टेशन्स बंद आहेत.

धर्मेंद्र प्रधान यांची मुलगी घेतेय कायद्याचे शिक्षण 

धर्मेंद्र प्रधान यांची मुलगी निमिषा प्रधान या मॅसाचुसेट्स येथे कायद्याचे शिक्षण घेत आहेत. 2023 सालापासून त्या अमेरिकेतच आहे. निमिषा सध्या सध्या यूएस इंडिया स्टेटेजिक पार्टनरशिप फोरममध्ये सिनिअर असोसिएट म्हणून काम करत आहेत