PM Modi: पंतप्रधान मोदींना अपशब्द वापरणाऱ्या तरुणीचा पुन्हा एक व्हिडिओ व्हायरल, आता म्हटलं काय?
Noida Teen on PM Narendra Modi: देशाचे पंतप्रधान नरेंद्र मोदी यांच्याविषयी अपशब्द वापरणाऱ्या तरुणीचा अजून एक व्हिडिओ व्हायरल झाला आहे. कॉक्रोच जनता पार्टीच्या आंदोलनात अनेक तरुणांच्या भाषेवरून देशात नाराजीचा सूर आळवला गेला. विशेषता भाजपच्या गोटातून आंदोलकांच्या भाषेबद्दल तीव्र नाराजी व्यक्त करण्यात आली. आता नोएडच्या त्या तरुणीचा नवीन व्हिडिओ व्हयारल झाला आहे.
नीट पेपरफुटी आणि तत्कालीन शिक्षणमंत्र्यांच्या राजीनाम्यासाठी कॉक्रोच जनता पार्टीने जंतर मंतरवर मोठे आंदोलन उभारले. 20 जुलै रोजी आंदोलकांवर लाठीचार्ज झाला. त्यानंतर तरुणाईचा संताप अनावर झाला. पंतप्रधानांपासून ते अनेक मंत्र्यांविरोधात अभद्र भाषेचा वापर झाला. काहींनी शिव्यांची लाखोली वाहिली. यात अनेक किशोरवयीन असल्याचे समोर आले. या भाषेबद्दल देशातील अनेकांनी चिंता व्यक्त केली. भाजप आणि एनडीएच्या गोटातून तरुणाईच्या तोंडी आलेली भाषेवर तीव्र नाराजी व्यक्त करण्यात आली. तर पंतप्रधान नरेंद्र मोदी यांनी आंदोलकांना या कृत्याबद्दल माफ केले. त्यानंतर मोदी यांच्याविषयी अपशब्द वापरणाऱ्या तरुणीचा अजून एक व्हिडिओ व्हायरल झाला आहे.
त्या तरुणीचा नवीन व्हिडिओ व्हायरल
देशाच्या पंतप्रधानांविषयी आक्षेपार्ह भाषेचा वापर करणारी तरुणी चांगलीच ट्रोल झाली होती. या 15 वर्षीय तरुणीचा अजून एक नवीन व्हिडिओ समोर आला आहे. मी अत्यंत आनंदी आहे. मला पंतप्रधान मोदी यांनी माफ केले आहे. ही माझ्यासाठी मोठी गोष्ट आहे, असे ही तरूणी या व्हिडिओत म्हणत आहे. या मुलीने अपशब्दांचा वापर केलेला असतानाही मोदी यांनी तिला माफ केल्याचे म्हटले. तर या मुलीच्या कुटुंबियांनी सुद्धा पंतप्रधानांचे आभार मानले.
मला दुसरे जीवन मिळाले
मला जणू दुसरे जीवन मिळाले. मी इतकी मोठी चूक केली होती. मला अजिबात वाटले नव्हते की ते मला क्षमा करतील. माफ करतील. मला तर वाटले की आता माझे सर्व काही संपले आहे. पण पंतप्रधान मोदी यांनी मला माफ केले. त्यांनी मला क्षमा करताच माझ्या डोळ्यातून अश्रू ओघळले. माझे मन भरून आले. मी रडायला लागले. ज्या व्यक्तीविषयी मी अपशब्द वापरले. इतके वाईट शब्द वापरले. तरीही त्यांनी मला माफ केले. असे वागल्यावरही त्यांनी मला क्षमा केली हेच माझ्यासाठी खूप आहे, असे ही तरुणी व्हिडिओत म्हणताना दिसत आहे.
संपूर्ण देशाची मागितली माफी
यापूर्वी या मुलीने एक व्हिडिओ शेअर केला होता. या व्हिडिओत तिने संपूर्ण देशाची माफी मागितली होती. मी अवघ्या 15 वर्षांची आहे. मला माझी खूप लाज वाटत आहे. मी नजरही वर करू शकत नाही, असे तिने यापूर्वीच्या व्हिडिओत म्हटले होते. नोएडा पोलिसांनी तिच्याविरोधात एफआयआर दाखल केला होता. त्यात तिचे वय 25 वर्षे इतके दाखवले होते. या मुलीला तिने वापरलेल्या भाषेचा पश्चाताप झाला आणि तिने देशाची माफी मागितली. 23 जुलै रोजी जंतरमंतरवर तिने अश्लाघ्य शब्दांचा वापर केला होता.
