बँकांचा तीन दिवसांचा संप, कोणत्या सेवांवर परिणाम होणार, बँकांची ग्राहकांसाठी सूचना

पाच दिवसांचा आठवडा जाहीर करणे, ‘कामगिरीवर आधारित प्रोत्साहन’ (PLI) योजना मागे घेणे या प्रमुख मागण्यासह विविध मागण्यांसाठी बँकांनी तीन दिवसाचा देशव्यापी संप जाहीर केला आहे. येत्या २८ ते ३० सप्टेंबर रोजी हा देशव्यापी संप होणार असून सार्वजनिक क्षेत्रातील ‘स्टेट बँक ऑफ इंडिया’ (SBI) आणि ‘इंडियन बँक’ यांनी ग्राहकांना सूचना जारी केली आहे. त्यामुळे ग्राहकांनी आपली कामे २८ तारखेच्या आधीच पूर्ण करावीत अशी आवाहन करण्यात येत आहे.

२६ सप्टेंबर रोजी चौथा शनिवार असल्याने आणि त्या दिवशी बँकेची सुट्टी आहे. या सलग सुट्ट्यांच्या काळात (extended weekend) बँकिंग सेवांवर परिणाम होऊ शकतो. मात्र, रिझर्व्ह बँक ऑफ इंडियाने (RBI) सर्व सार्वजनिक क्षेत्रातील बँका आणि प्रादेशिक ग्रामीण बँकांना (RRBs) २७ सप्टेंबर या रविवारी नेहमीप्रमाणे कामकाज करण्याची परवानगी दिली आहे; त्यानुसार बँकांच्या सर्व शाखा, कार्यालये, एटीएम-संलग्न शाखा आणि ‘करन्सी चेस्ट्स’ (रोख रकमेची साठवणूक करणारी केंद्रे) पूर्णपणे कार्यरत राहतील.

बँक संघटनांनी पुकारलेल्या तीन दिवसांच्या देशव्यापी संपाच्या पार्श्वभूमीवर, सार्वजनिक क्षेत्रातील ‘स्टेट बँक ऑफ इंडिया’ (SBI) आणि ‘इंडियन बँक’ यांनी ग्राहकांना त्यांचे महत्त्वाचे व्यवहार आधीच पूर्ण करण्याचे आवाहन केले आहे.

‘युनायटेड फोरम ऑफ बँक युनियन्स’ने (UFBU) तीन दिवसांच्या देशव्यापी संपाची हाक दिली आहे. प्रादेशिक ग्रामीण बँकांनीही या संपाला पाठिंबा दिला आहे. हा संप ३० सप्टेंबर रोजी होणाऱ्या खात्यांच्या सहामाही लेखासमाप्तीच्या (half-yearly closing) कालावधीत होत आहे. यामुळे तिजोरीविषयक कामकाज (treasury operations), धनादेश वटवण्याची प्रक्रिया (cheque clearing) आणि कॉर्पोरेट व्यवहार विस्कळीत होऊ शकतात.

प्रिय ग्राहकांनो

बँक कर्मचाऱ्यांच्या काही संघटनांनी २८ ते ३० सप्टेंबर या कालावधीत ३ दिवसांचा संप पुकारला आहे. त्यामुळे कृपया तुमचे महत्त्वाचे व्यवहार आधीच पूर्ण करून घ्या. एटीएम/एडीडब्ल्यूएम (ADWMs), सीएसपी (CSPs), योनो (YONO), इंटरनेट/मोबाइल बँकिंग, यूपीआय (UPI) आणि इतर डिजिटल माध्यमांचा वापर करा,” असे एसबीआयने (SBI) मंगळवारी सायंकाळी ग्राहकांसाठी जारी केलेल्या निवेदनात म्हटले आहे.