CJP Delhi protest : दिल्लीत जंतर-मंतरवर पुन्हा गोंधळ, पोलिसांचा मोठा फौजफाटा तैनात; हजारो आंदोलक…

CJP Delhi Protest : कॉकरोच जनता पार्टीच्या दिल्लीतील आंदोलनाला देशातून मोठा प्रतिसाद मिळतोय. दिल्लीच्या जंतर मंतर मैदानावर हजारो तरुण आंदोलन करत आहेत. काहीही झालं तरी आम्ही केंद्रीय शिक्षणमंत्र्यांचा राजीनामा घेणारच, असा निर्धार या आंदोलकांनी व्यक्त केलाय. विरोधकांनीही या मुद्द्यावरून आक्रमक पवित्रा धारण केलाय. अगोदर पंतप्रधान नरेंद्र मोदी यांच्या निवासस्थानापुढे ठिय्या आंदोलन केल्यानंतर लोकसभेचे विरोधी पक्षनेते राहुल गांधी हे आता गांधी स्मृती भवनाकडे निघाले आहेत. या सर्व घडामोडी घडत असताना दुसरीकडे आता जंतर-मंतरवरी घडामोडी वाढल्या आहेत. जंतर-मंतरवर गोंधळाची स्थिती निर्माण झाली आहे. त्यामुळे या भागात पोलिसांचा मोठा फौजफाटा तैनात करण्यात आलाय.

जंतर-मंतरवर नेमकं काय घडतंय?

जंतर मंतर मैदानावर सीजेपीचे संस्थापक अभिजित दीपके हे आंदोलन करत आहेत. त्यांच्यासोबत अनेक तरुण हे जंतर मंतरवर ठाण मांडून बसलेले आहेत. अधून मधून अभिजित दीपके हे आंदोलकांना मार्गदर्शन करत आहेत. परंतु सध्या जंतर मंतरवर गोंधळाची स्थिती निर्माण झाली आहे. आंदोलक काहीसे आक्रमक झाले आहेत. त्यामुळे या भागात पोलीसही आक्रमक झाले आहेत. वातावरण चिघळू नये म्हणून जंतर मंतरवर पोलिसांचा चोख बंदोबस्त ठेवण्यात आलाय.

सीजेपीने केली मोठी घोषणा

दुसरीकडे सीजेपीने हे आंदोलन आता देशव्यापी करण्याचे ठरवले आहे. त्याचाच एक भाग म्हणून सीजेपीने मोठी घोषणा केली आहे. 24 जुलै रोजी देशव्यापी आंदोलन केले जाईल, असे सीजेपीने सांगितले आहे. या आंदोलनाची तयारीही चालू झाली आहे. सीजेपीच्या या घोषणेमुळेही सध्या केंद्र सरकारवर दबाव वाढत आहे. दुसरीकडे आम्ही सीजेपीसोबत कोणत्याही विषयावर चर्चा करण्यासाठी तयार आहोत, अशी भूमिका सरकारने घेतलेली आहे. संसदेतही आम्ही सर्व विषयावर चर्चा करू असे सत्ताधारी मोदी सरकारने विरोधकांना सांगितलेले आहे. या सर्व घडामोडी घडत असताना आता नेमके काय होणार? धर्मेंद्र प्रधान यांचा राजीनामा घेतला जाणार का? याकडे देशाचे लक्ष लागले आहे.