Abhijeet Dipke: तू ये तर तुझा खेळ संपवून टाकतो आणि कायमचाच… अभिजीत दिपके यांना मिळाली धमकी

Abhijeet Dipke CJP: कॉकरोच जनता पार्टीचे सध्या ‘स्कूल ठीक करो’ ही मोहिम सुरु आहे. अलीकडेच, सीजेपीचे प्रवक्ते आशुतोष रांका यांनी जयपूरमधील एका शाळेला भेट दिल्यानंतर मोठा गदारोळ झाला. गावकऱ्यांनी कॉकरोच जनता पार्टीच्या कार्यकर्त्यांविरुद्ध आंदोलन केले, ज्यामुळे झटापट झाली आणि त्यात अनेक जण जखमी झाले. यानंतर, सीजेपीने सरकारला संबंधितांवर कारवाई करण्यासाठी आणि शाळेची दुरुस्ती करण्यासाठी ४८ तासांचा अल्टिमेटम दिला. सीजेपीचे संस्थापक अभिजीत दीपके यांनी स्वतः जयपूरमध्ये आंदोलन करणार असल्याचे म्हटले. यानंतर, जयपूरचे रहिवासी राकेश गुर्जर यांनी अभिजीत दीपके यांना धमकी दिली. ही तीच व्यक्ती आहे, जिने जूनमध्ये जयपूरमध्ये अभिजीत दीपके यांना थोबाडीत मारली होती.

वास्तविक, जयपूरमधील हा गदारोळ रामपुरा-कंवरपुरा येथील सरकारी शाळेविरोधात सीजेपीने केलेल्या आंदोलनामुळे झाला होता. रामपुराची सरकारी शाळा एका गोठ्यात चालवली जात होती. आशुतोष रांका यांनी काही सीजेपी कार्यकर्त्यांसह गावाला भेट दिली होती. यावेळी गावकऱ्यांनी विरोध केला. या घटनेत सीजेपीच्या एका नेत्याचा हात फ्रॅक्चर झाला आणि इतर अनेक कार्यकर्तेही जखमी झाले असे म्हटले जात आहे.  या घटनेनंतर, सीजेपीचे आशुतोष रांका यांनी हल्लेखोर भाजप-पुरस्कृत गुंड असल्याचा आरोप केला. त्यांनी हिंसाचारात सहभागी असलेल्यांवर कारवाई करण्याचा आणि ४८ तासांच्या आत शाळेची दुरुस्ती करण्याचा अल्टिमेटमही दिला.

आशुतोष रांका यांच्या अल्टिमेटमच्या पार्श्वभूमीवर, कॉकरोच जनता पक्षाचे संस्थापक अभिजित दीपके यांनीही जयपूरला येऊन आंदोलन करण्याची धमकी दिली. एका व्हिडिओमध्ये ते म्हणाले की, जर ४८ तासांच्या आत शाळेची दुरुस्ती झाली नाही आणि हिंसाचारात सहभागी असलेल्या गुंडांना अटक झाली नाही, तर ते स्वतः जयपूरला येऊन शाळा दुरुस्त होईपर्यंत शाळेसमोर ठिय्या मांडतील. ” आशुतोष रांका आणि अभिजीत दीपके यांच्या अल्टिमेटम आणि आंदोलनाच्या धमकीनंतर, राकेश गुर्जर यांचा एक व्हिडिओ समोर आला आहे.

राकेश गुर्जर म्हणाले, “तू कोण आहेस, किड्या? पहिली गोष्ट म्हणजे, जयपूरला येण्याची तुझी हिम्मत कशी झाली… तू गुंडगिरीची भाषा वापरत आहेस. गावकरी खूप साधे आणि मनमिळाऊ आहेत, ज्यांच्यासोबत सीजेपीच्या किड्यांनी गुंडगिरी करण्याचा प्रयत्न केला. आम्ही गावकऱ्यांसोबत आहोत आणि सर्व राष्ट्रवादी त्यांच्यासोबत उभे आहेत. जयपूरला येण्याची तुझी हिम्मत कशी झाली… हे काही जंतर मंतर नाही जिथे तू येऊन काहीही बरळू शकतोस. ह्यावेळी आम्ही तुझा खेळ संपवून टाकू. मी म्हणतोय की आम्ही ३.० ची तयारी करत आहोत. ह्यावेळी आम्ही तुला कायमचा चोप देऊ आणि गटारात फेकून देऊ.”

१५ जून रोजी जयपूरमधील शहीद स्मारकाजवळ झालेल्या सीजेपीच्या आंदोलनादरम्यान अभिजीत दीपके यांना थोबाडीत मारणारी व्यक्ती राकेश गुर्जरच आहे. त्यानंतर, अभिजीत दीपके यांना थोबाडीत मारल्या प्रकरणी पोलिसांनी राकेश गुर्जरसह पाच जणांना अटक केली. राकेश गुर्जर हा जयपूरमधील बागरू पोलीस ठाण्यांतर्गत येणाऱ्या कुचावासचा रहिवासी आहे. अभिजीत दीपके यांना थोबाडीत मारल्यानंतर राकेश गुर्जर म्हणाला, “मी एक राष्ट्रवादी आहे; या लोकांची जिहादी मानसिकता आहे. पेपरफुटी हे केवळ एक निमित्त आहे.”