जे कुणालाच नाही जमलं ते ज्ञानेश कुमार यांच्यामुळं साधलं… दोन कट्टर विरोधक आले एकत्र, डाव्यांकडून ममता दीदींना फोन का?

एक निवडणूक आयोग काय करू शकतो? असा सवाल विचारला तर निष्पक्ष निवडणुका घेऊ शकतो, मतदारांचे अधिकार अबाधित ठेवू शकतो असे आतापर्यंत म्हटले जायाचं. पण दोन्ही कट्टर राजकीय विरोधकांना एकत्र आणण्याचं काम केंद्रीय निवडणूक आयोग आणि मुख्य आयुक्तांनी केलं तर तुमचा विश्वास बसेल का? पण हे नवल घडलं आहे. मुख्य निवडणूक आयुक्त ज्ञानेश कुमार यांची कार्यशैली आणि विशेष मतदार यादी पुनरावृत्तीवरून (SIR) राजकीय विरोधक एकत्र येत असल्याचे समोर आले आहे. राजकीय विरोधक तृणमूल काँग्रेस (TMC) आणि डावे पक्षात (Left Party) संवादाचा पूल दिसून आला.

डाव्यांचा स्पेशल कॉल

द इंडियन एक्सप्रेसने सूत्रांच्या आधारे दिलेल्या वृत्तानुसार, ममता बॅनर्जी आणि सीपीआय(एम) चे महासचिव एमए बेबी यांच्यात शुक्रवारी फोनवरून चर्चा झाली. दोन्ही विरोधी गोटातील पक्षांमध्ये निवडणूक आयोग आणि ज्ञानेश कुमार यांच्याविरोधात सूर जुळले. लवकरच ज्ञानेश कुमार यांच्याविरोधात मोहिम छेडण्यात येणार आहे. त्यात तृणमूल काँग्रेससोबत डावे दिसल्यास आश्चर्य वाटायला नको. दोन्ही नेत्यांमध्ये काय चर्चा झाली याची सविस्तर माहिती समोर आली नाही. तर ममता दीदी आणि लोकसभेतील विरोधी पक्षनेते राहुल गांधी यांच्यातही चर्चा झाल्याची माहिती समोर येत आहे. लवकरच इंडिया आघाडीची बैठक होण्याची दाट शक्यता आहे.

डाव्यांचे बिगर भाजप पक्षांना आवाहन

तर दोन दिवसांपूर्वी सीपीआय (एम) महासचिवांनी ममता दीदी आणि इंडिया आघाडीतील सर्वच पक्षांना तसेच इतर पक्षांना पत्र पाठवले आहे. देशातील लोकशाही धोक्यात आल्याचा हाकारा देत आंदोलन करण्यासाठी एकत्र येण्याची गळ या पत्रात घालण्यात आली आहे. विशेष म्हणजे ममता दीदींनी या पत्रालाही उत्तर दिले आहे. त्यांनी डाव्यांची बाजू उचलून धरली आहे. सध्याची परिस्थिती बिकट असून भाजपविरोधी सर्वच राजकीय पक्षांनी एकत्र येण्याचे आवाहन त्यांनी केले आहे.

लोकशाही वाचवण्यासाठी नवीन मोट

भाजपाने अनेक घटनात्मक संस्था बाटवल्याचा आणि तिथे राष्ट्रीय स्वयंसेवक संघाची माणसं पेरल्याचा आरोप राहुल गांधींसह विरोधक करत आहेत. या संस्था वाचवण्यासाठी आता विरोधी पक्षांची पुन्हा मोट बांधण्याचे आवाहन करण्यात आले आहे. ज्ञानेश कुमार यांचा आयता मुद्दा हाती आल्यानंतर विरोधी पक्षांमध्ये एकीचे वारे वाहत आहे. यामुळे देशात नवीन राजकीय समीकरणं समोर येण्याची शक्यता आहे. देशाच्या राजकीय पटलावर मोठ्या उलथापालथीचे संकेत या घडामोडीतून मिळत आहेत.