सलग तिसऱ्या दिवशी सापडली लाखोंची बेहिशोबी रक्कम, काय आहे प्रकार?
बेहिशोबी रक्कम सापडण्याचा सिलसिला कोल्हापुरात कायम आहे. सलग तिसऱ्या दिवशी लाखो रुपये सापडले आहे. हे रुपये कुठे नेले जात आहेय, हा प्रश्न आहे. कर्नाटक विधानसभा निवडणुकीपूर्वी पैशांचा पाऊस जात आहे. परंतु महाराष्ट्रातून ही रक्कम जात आहे.
भूषण पाटील, कोल्हापूर : निवडणूक आली की देशात राजकीय पक्षांकडून मोठी तयारी सुरु असते. मग मतदार काही दिवसांसाठी राजा होतो. राजकीय पक्ष व नेते मतदारास संमोहीत करण्यासाठी अनेक बेकायदेशीर मार्ग अवलंबतात. त्यासाठी बेहिशोबी संपत्ती म्हणजे काळा पैशांचा वापर केला जातो. सध्या कर्नाटक विधानसभा निवडणुकीची रणधुमाळी सुरु आहे. त्याचा परिणाम कर्नाटकचा सीमा भाग असलेल्या कोल्हापूरमध्येही दिसून येत आहे. सलग तिसऱ्या दिवशी कर्नाटकात बेहिशोबी रक्कम सापडली आहे. निवडणूक मे महिन्यात असताना आतापासून पैशांचा पाऊस सुरु असल्याचे यामुळे दिसून येत आहे.
सलग तिसऱ्या दिवशी
निवडणूक आयोगाने दोन दिवसांपूर्वी दिलेल्या प्रसिद्धीपत्रकात कर्नाटकात आठ दिवसांत 69.36 कोटी रुपये रोख, दारू आणि इतर साहित्य जप्त केल्याचे म्हटले होते. आता कर्नाटकच्या सीमेवर असलेल्या महाराष्ट्रातील कोल्हापुरात लाखोंची रोकड सापडली आहे.कोल्हापुरातील कोगनोळी टोल नाक्यावर बेकायदेशीर रोकड सापडण्याचे सत्र सुरू आहे. सलग तिसऱ्या दिवशी लाखोंची रोकड सापडली आहे. शनिवारी बेकायदेशीरपणे नेली जात असणारी साडेतेरा लाखांची रोकड पकडली आहे. त्यापूर्वी गुरुवारी तब्बल दीड कोटी तर शुक्रवारी साडेसात लाख रुपये सापडले होते.
का सुरु आहे तपासणी
कर्नाटक विधानसभा निवडणुकीच्या पार्श्वभूमीवर कर्नाटक प्रशासनाकडून कोगनोळी टोल नाक्यावरुन जाणाऱ्या – येणाऱ्या वाहनांची तपासणी सुरू केली आहे. तपासणी दरम्यान लाखोंची रोकड सापडत आहे. कर्नाटक विधानसभेची निवडणूक १० मे रोजी होणार आहे. त्यापूर्वी पैशांचा पाऊस सुरु झाला आहे.
कर्नाटकात मोठी रक्कम जप्त
कर्नाटकात जप्त केलेल्या रकमेत 22.75 कोटी रुपये रोख आहेत. 24.45 कोटी रुपयांची दारु आहे. मतदारांना देण्यासाठी आणलेल्या भेटवस्तूंची किंमत 12 कोटी रुपये आहे. जप्त केलेल्या साहित्यात रोख रक्कम, दारू, भेटवस्तूंसोबत ड्रग्जसुद्धा आहे. एकूण 69 कोटी 36 लाख 17 हजार 467 रुपयांचा समावेश आहे.
526 एफआयआर
धारवाड मतदारसंघातून सुमारे 45 लाख रुपये किमतीचे 725 ग्रॅम सोने जप्त केले, तर फ्लाइंग स्क्वॉड टीमने बेंगळुरू शहरातील एका मतदारसंघातून 34 लाख रुपयांपेक्षा जास्त किमतीच्या मोफत वस्तू जप्त केल्या. दुसरीकडे, 6 एप्रिल रोजीच बेलागावच्या खानापूर तालुका परिसरातून 4.61 कोटी रुपये रोख आणि 395 ग्रॅम सोने (21.25 कोटी) जप्त करण्यात आले आहे. जप्तीप्रकरणी आतापर्यंत एकूण 526 एफआयआर नोंदवण्यात आले आहेत.
हे ही वाचा
निवडणुकीपूर्वी आली कोट्यवधींची रोकड, मद्य अन् भेटवस्तू
बसमधून प्रवास करणाऱ्या व्यक्तीकडे सापडली लाखांची रोकड, काय आहे प्रकार?
