India New CDS Appointed : देशाचे नवीन चीफ ऑफ डिफेंस स्टाफ, नौदल प्रमुख यांच्या नावाची सरकारकडून घोषणा
India New CDS Appointed : केंद्र सरकारकडून आज देशाचे नवीन चीफ ऑफ डिफेंस स्टाफ आणि नौदल प्रमुख यांच्या नावाची घोषणा करण्यात आली आहे. विद्यमान सीडीएस जनरल अनिल चौहान यांचा कार्यकाळ 30 मे 2026 रोजी समाप्त होणार आहे.
केंद्र सरकारने लेफ्टनंट जनरल एन एस राजा सुब्रमणी (सेवानिवृत्त) यांना देशाचं पुढचं चीफ ऑफ डिफेंस स्टाफ (CDS) म्हणून नियुक्त केलं आहे.वर्तमान सीडीएस जनरल अनिल चौहान यांची जागा ते घेतील. 30 मे 2026 रोजी अनिल चौहान यांचा कार्यकाळ समाप्त होणार आहे. पदभार स्वीकारल्यानंतर लेफ्टनंट जनरल सुब्रमणी सैन्य विषयक विभाग सचिव म्हणून काम करतील. लेफ्टनंट जनरल सुब्रमणी यांची सैन्यातील कारकिर्द शानदार आहे. सध्या ते राष्ट्रीय सुरक्षा परिषद सचिवालयात सैन्य सल्लागार म्हणून कार्यरत आहेत. याआधी ते सैन्य उपप्रमुख आणि मध्य कमान जीओसी इन सी सारख्या महत्वपूर्ण पदांवर काम केलं आहे. थिएटर कमांड आणि सशस्त्र सैन्य दल यांचं एकत्रीकरण करण्याची प्रक्रिया पुढे नेण्यात त्यांची भूमिका महत्वाची असेल.
लेफ्टनंट जनरल सुब्रमणी नॅशनल डिफेन्स अकादमी, जॉइंट सर्विसेज कमांड एंड स्टाफ कॉलेज (यूके) आणि नॅशनल डिफेन्स कॉलेजचे माजी विद्यार्थी आहेत. त्यांनी किंग्स कॉलेज लंडनमधून मास्टरची डिग्री मिळवली आहे. लेफ्टनंट जनरल सुब्रमणी यांना 1985 साली गढवाल रायफल्समध्ये कमिशन मिळालं. या दरम्यान वाइस एडमिरल कृष्णा स्वामीनाथन यांची भारतीय नौदलाचे पुढचे प्रमुख म्हणून नियुक्ती करण्यात आली आहे. ते 31 मे रोजी पदभार स्वीकारतील. त्यांचा कार्यकाळ 31 डिसेंबर 2028 पर्यंत असेल.
सीडीएसची जबाबदारी काय असते?
मावळते सीडीएस जनरल अनिल चौहान यांची पाकिस्तान विरुद्ध ऑपरेशन सिंदूरमध्ये महत्वाची भूमिका होती. रणनितीक निर्णय, शस्त्रास्त्र खरेदी, तिन्ही सैन्य दलांच्या गरजा यात सीडीएसचा रोल महत्वाचा असतो. नौदल, एअरफोर्स आणि लष्कर या तिन्ही सैन्य दलांमध्ये उत्तम समन्वय रहावा यासाठी केंद्र सरकारने सीडीएस या पदाची निर्मिती केली आहे. ऑपरेशन सिंदूरच्यावेळी तिन्ही सैन्य दलांमध्ये सीडीएसमुळे उत्तम समन्वय राखता आला. थिएटर कमांडवर तिन्ही सैन्य दलात एकमत घडवणं हे नव्या सीडीएससमोरील मुख्य लक्ष्य असेल. याआधी जनरल बीपिन रावत देशाचे पहिले चीफ ऑफ डिफेन्स स्टाफ होते. पदावर असताना हेलिकॉप्टर अपघातात त्यांचं निधन झालं होतं.
