आमदाराच्या मुलीची लग्नपत्रिका व्हायरल, लोक का सर्च करताहेत अमेरिकेतील हे शहर?

shivangi singh

बिहारच्या मोकामाचे आमदार अनंत सिंह यांची मुलगी शिवांगी सिंह हिचा विवाह सध्या चर्चेचा विषय ठरला आहे. मीडियापासून सोशल मीडियापर्यंत शिवांगीच्या लग्नाची तुफान चर्चा सुरू आहे. सध्या बिहारमध्ये लग्नाची भव्य तयारी सुरू आहे. या दरम्यानच शिवांगीची लग्नपत्रिकाही सोशल मीडियावर तुफान व्हायरल झाली आहे. या लग्नपत्रिकेमुळे केवळ तिच्या लग्नाचीच चर्चा होत नाहीये, तर अमेरिकेतील एक शहर सुद्धा या चर्चेच्या केंद्रस्थानी आलं आहे. लग्नपत्रिका व्हायरल झाल्यानंतर लोक गुगलवर अमेरिकेतील जॉर्जिया स्टेट आणि त्याच्याशी संबंधित शहरे शोधत आहेत.

गुगल ट्रेंडसच्या सर्च डेटामध्ये गेल्या काही तासात जॉर्जिया शहरांमध्ये लोकांनी खूपच इंटरेस्ट दाखवल्याचं दिसून आलं आहे. त्याचं कारण म्हणजे लग्नपत्रिकेत देण्यात आलेली एक माहिती आहे. लग्नपत्रिकेत नवरदेव ऋषिकेश कुमारच्या शैक्षणिक पात्रतेचीही माहिती देण्यात आली आहे. ऋषिकेश यांनी अमेरिकेच्या अटलांटा येथील जॉर्जिया स्टेट विद्यापीठातून एमबीए केलं आहे. या माहितीमुळे लोकांची अमेरिकेतील शहरांबद्दलची उत्सुकता प्रचंड वाढली आहे.

जॉर्जिया कुठे आहे?

सोशल मीडियावर लग्नपत्रिकेचा फोटो आल्यानंतर लोक जॉर्जिया कुठे आहे? आणि तिथलं विद्यापीठ कुठे आहे? तिथे कोणत्या प्रकारचं शिक्षण दिलं जातं? याची माहिती गुगलवर शोधत आहेत. तसेच क्यूएस रँकिंगमध्ये या विद्यापीठाला कितवी रँक मिळालेली आहे, याची माहितीही लोक शोधत आहेत. याशिवाय या शहराला लागून असलेल्या इतर शहरांची माहितीही लोक सर्च करताना दिसत आहेत.

सांस्कृतिक शहर

जॉर्जिया हे अमेरिकेच्या दक्षिण पूर्व येथील एक महत्त्वाचं राज्य आहे. याची राजधानी अटलांटा आहे. जॉर्जिया हे अमेरिकेतील प्रमुख शहरांपैकी हे एक शहर आहे. अटलांटा हे व्यवसाय, परिवहन, शिक्षण आणि संस्कृतीच्या दृष्टीने अत्यंत महत्त्वाचं आहे. याच शहरात जॉर्जिया स्टेट यूनिव्हर्सिटी आहे. हे एक सार्वजिनक विद्यापीठ आहे. या ठिकाणी बिझनेससहीत अनेक विषयांचं शिक्षण दिलं जातं.

25 नोव्हेंबरला लग्न

दरम्यान, शिवांगी हिचं लग्न येत्या 25 नोव्हेंबरला होणार आहे. ऋषिकेश बिहार जिल्ह्यातील पटणा येथील बिहटाचे रहिवाशी आहेत. पण ते सध्या अमेरिकेत स्थायिक असून तिथेच नोकरी करतात. लग्नासाठी त्यांचं कुटुंब बिहारमध्ये गावी आलं आहे. या लग्नाची भव्य तयारी सुरू आहे. 10 एकर जागेवर मंडप बांधण्यात येणार आहे. या लग्नाला सुमारे 4 लाख पाहुणे येणार आहेत. या पाहुण्यांसाठी मेजवाणीत 150 प्रकारचे पदार्थ ठेवण्यात आले आहेत. तसेच लग्नाच्या निमित्ताने घोड्यांची शर्यतही आयोजित करण्यात आली असून जिंकणाऱ्या घोड्याला थार आणि बाइक गिफ्ट दिली जाणार आहे. तसेच अनंत सिंह यांनी आपल्या लाडक्या जावयला गिफ्ट म्हणून देण्यासाठी लँड रोव्हर डिफेंडर कार घेतली आहे. तर, मुलासाठी बीएमडब्ल्यू कार घेतली आहे.