2024 सालच्या नीट पेपर फुटीप्रकरणी संजीव मुखिया यांविरोधात पुरावे नाहीत, CBI च्या तपासात समोर!
2024 साली नीट यूजी परीक्षेत पेपरफुटी झाली होती. पाटण्यात एका शाळेच्या वसतीगृहात विद्यार्थ्यांकडे या परीक्षेचा पेपर अगोदरच पोहोचला होता. पेपरफुटीचे हे प्रकरण समोर आल्यानंतर बिहार पोलिसांनी काही विद्यार्थी तसेच पेपरफुटी करणाऱ्या टोळीला ताब्यात घेतलं होतं.
NEET Paper Leak : 2024 मध्ये बिहार पोलिसांनी NEET (UG) 2024 परीक्षेची प्रश्नपत्रिका चोरी झाल्याचा प्रकार उघडकीस आणला आणि त्यासंदर्भात गुन्हा दाखल केला होता. प्राथमिक तपासात संजीव कुमार उर्फ संजीव मुखिया यांच्यावर संशय व्यक्त करण्यात आला होता, कारण ते यापूर्वीही इतर काही परीक्षा प्रश्नपत्रिका चोरी किंवा गळतीच्या प्रकरणांमध्ये सहभागी असल्याचे आढळले होते. परंतु आता कोणताही सबळ पुरावा न आढळल्याने त्यांच्याविरोधात कोणतेही आरोपपत्र दाखल करण्यात आलेले नाही. संजीव मुखिया यांना आता जामीन मिळाला आहे. CBI च्या प्रकरणात जामीन मिळाल्यानंतरही ते बिहार पोलिसांकडून तपास सुरू असलेल्या इतर प्रकरणांमुळे न्यायालयीन कोठडीतच राहणार आहेत.
2024 साली झालेल्या नीट पेपरफुटी प्रकरणात बिहार पोलिसांनी दाखल केलेल्या एफआयआरमध्ये त्यांना आरोपी म्हणून नमूद करण्यात आले होते. यानंतर या प्रकरणाचा तपास केंद्रीय अन्वेषण विभागाकडे (CBI) सोपविण्यात आला होता. तपासादरम्यान CBI ने NEET (UG) 2024 ची चोरी झालेली प्रश्नपत्रिका चोरणे, तिचे वितरण करणे तसेच त्या प्रश्नपत्रिकेचा फायदा घेणारे सर्व उमेदवार यांची ओळख पटवली. त्यानुसार, CBI ने पटणा येथील संबंधित न्यायालयात 45 जणांविरुद्ध अनेक आरोपपत्रे (चार्जशीट) दाखल केली होती.
तपासादरम्यान CBI ला संजीव कुमार उर्फ संजीव मुखिया यांचा NEET (UG) 2024 प्रश्नपत्रिका चोरी किंवा वितरणात सहभाग असल्याचे कोणतेही पुरावे आढळले नाहीत. मधल्या काळात संजीव मुखिया फरार होते. त्यानंतर बिहार पोलिसांनी इतर प्रकरणांमध्ये त्यांना अटक केली. NEET-UG 2024 प्रकरणातील एफआयआरमध्ये त्यांचे नाव आरोपी म्हणून असल्यामुळे CBI ने त्यांना या प्रकरणात चौकशीसाठी पोलीस कोठडीत ठेवले होते. मात्र, तपासादरम्यान NEET-UG 2024 प्रकरणात त्यांच्या सहभागाचा कोणताही पुरावा समोर न आल्याने CBI ने या प्रकरणात त्यांच्याविरुद्ध कोणतेही आरोपपत्र दाखल केले नाही. त्यामुळे त्यांना या प्रकरणात जामीन मिळाला. CBI ने NEET (UG) 2024 प्रश्नपत्रिका चोरी प्रकरणाचा सखोल तपास करून सर्व संबंधित आरोपींची ओळख पटवली असून, त्यांच्यापैकी कोणालाही कायद्याच्या प्रक्रियेतून सुटू दिलेले नाही, असे स्पष्ट केले आहे.
2024 सालचं पेपरफुटी प्रकरण काय होतं?
2024 साली नीट यूजी परीक्षेत पेपरफुटी झाली होती. पाटण्यात एका शाळेच्या वसतीगृहात विद्यार्थ्यांकडे या परीक्षेचा पेपर अगोदरच पोहोचला होता. पेपरफुटीचे हे प्रकरण समोर आल्यानंतर बिहार पोलिसांनी काही विद्यार्थी तसेच पेपरफुटी करणाऱ्या टोळीला ताब्यात घेतलं होतं. सर्वात अगोदर झारखंडमधील हजारीबाग येथून हा पेपर लीक करण्यात आला होता. त्यानंतर लाखो रुपये घेऊन नंतर हा पेपर वाटण्यात आला होता.
