वृद्धेच्या सुरेल आवाजातील ‘एक प्यार का नगमा’ वायरल, 50 हजार जणांकडून शेअर

कोलकाता : पश्चिम बंगालमधील एका वृद्ध महिलेचा सुरेल आवाज सध्या सोशल मीडियावर वायरल झाला आहे. ‘एक प्यार का नगमा है’ (Ek Pyar Ka Nagma Hai) या गानकोकीळा लता मंगेशकर (Lata Mangeshkar) यांनी गायलेल्या मूळ गाण्याचं आणखी एक गोड वर्जन या व्हिडिओमध्ये ऐकायला मिळत आहे.

लता मंगेशकर यांच्या आवाजाचे चाहते जगभरात पसरले आहेत. लता मंगेशकर यांचे स्वर्गीय स्वर ऐकत अनेक पिढ्या लहानाच्या मोठ्या झाल्या. 1972 साली प्रदर्शित ‘शोर’ चित्रपटात लता मंगेशकरांनी गायलेल्या ‘एक प्यार का नगमा है’ या गाण्याची सूरावट पुन्हा इंटरनेटवर ऐकू येत आहे. निमित्त ठरलं ते पश्चिम बंगालमधील रानाघाट रेल्वे स्थानकावरील महिलेने आळवलेले सूर.

‘बारपेटा टाऊन- द प्लेस ऑफ पीस’ (BarpetaTown The place of peace) या फेसबुक पेजवरुन दोन मिनिटं 12 सेकंदांचा हा व्हिडिओ गेल्या रविवारी पोस्ट करण्यात आला होता. अवघ्या पाच दिवसांतच या व्हिडिओने 27 लाख व्ह्यूजचा आकडा पार केला. या व्हिडिओला जवळपास 50 हजार यूझर्सनी शेअर केलं आहे. अनेकांनी कमेंट्समधून कौतुकाचा वर्षाव केला आहे.

‘शोर’ चित्रपटात मनोज कुमार, नंदा आणि मास्टर सत्यजीत यांच्या भूमिका होत्या. लता मंगेशकर आणि मुकेश यांनी गायलेल्या ‘एक प्यार का नगमा है, मौजो की रवानी है, जिंदगी और कुछ भी नहीं, तेरी मेरी कहानी है’ या गाण्याला आजही चाहत्यांची पसंती मिळते. संतोष आनंद यांनी लिहिलेल्या या गाण्याला लक्ष्मीकांत-प्यारेलाल या प्रसिद्ध जोडीने संगीतबद्ध केलं होतं.

या पेजवरुन महिलेने गायलेलं ‘ऐ मेरे वतन के लोगो’ हे गाणंही शेअर करण्यात आलं आहे.