दारू पितात का? मांस खातात का? जाणवं घालता का?; राम मंदिर CEO पदाच्या मुलाखतीत विचारले गेले हे प्रश्न

राम मंदिराच्या CEO पदाच्या निवड प्रक्रियेला सुरुवात झाली आहे. ११ ऑगस्टपासून CEO पदासाठी निवडीचा अंतिम टप्पा म्हणजे मुलाखती सुरू झाल्या आहेत. या मुलाखती १२ ऑगस्टपर्यंत चालणार आहेत. राम मंदिरच्या CEO पदासाठी देशभरातून ५,३०० हून अधिक अर्ज आले होते. त्यापैकी फक्त १८ पात्र उमेदवारांना मुलाखत फेरीसाठी शॉर्टलिस्ट करण्यात आले आहे. पहिल्या दिवशी १० माजी वरिष्ठ अधिकाऱ्यांच्या मुलाखती झाल्या आणि उर्वरित ८ उमेदवारांच्या मुलाखती बुधवारी होणार आहेत.

मुलाखतींचे आयोजन अयोध्या राम मंदिर परिसराच्या उत्तर भागातील ग्रीन हाऊसमध्ये करण्यात आले. मंगळवारी झालेल्या मुलाखतींमध्ये तीन माजी आयएएस अधिकारी, एक निवृत्त आयपीएस अधिकारी आणि चार माजी लष्करी व शिक्षण क्षेत्रातील अनुभवी अधिकारी सहभागी झाले.

पहिल्या दिवशी दोन सत्रांत मुलाखती

मंगळवारी १८ पैकी १० उमेदवारांच्या प्रत्यक्ष मुलाखती झाल्या, ज्यात चार माजी IAS अधिकारी होते. मुलाखती सकाळी ९ वाजता सुरू झाल्या आणि त्या दोन सत्रांत चालल्या. पहिले सत्र सकाळी ९ ते दुपारी १२ वाजेपर्यंत तर दुसरे सत्र दुपारी २ ते संध्याकाळी ६ वाजेपर्यंत चालले. प्रत्येक उमेदवाराशी सुमारे २५ ते ३० मिनिटे चर्चा झाली. माजी IPS अधिकारी राजेश पांडे हेही संभाव्य उमेदवारांच्या यादीत आहेत आणि त्यांची मुलाखत आज होणार आहे. ते उत्तर प्रदेश STF चे संस्थापक सदस्यांपैकी एक आहेत आणि लखनऊच्या अलीगंज येथील ऐतिहासिक हनुमान मंदिराचे सचिवही आहेत.

या अधिकाऱ्यांची नावे चर्चेत

माजी IAS अधिकारी योगेश्वर मिश्रा यांचे नावही चर्चेत आहे. ते फैझाबादचे जिल्हाधिकारी राहिले आहेत. राम मंदिरच्या CEO पदाच्या मुलाखतीदरम्यान निवड समितीचे तिन्ही सदस्य, उमेदवार आणि राम मंदिर ट्रस्टचे अंतरिम महासाचिव डॉ. कृष्ण मोहन उपस्थित होते.

मुलाखतीत काय-काय विचारले गेले?

-उमेदवारांकडून मुलाखतीपूर्वी सुमारे तीन डझन प्रश्नांचा ऑनलाइन Google Form भरून घेण्यात आला.

-मुलाखतीत उमेदवारांकडे त्यांच्या प्रशासकीय पदांवरील अनुभव, धार्मिक-सामाजिक संस्थांच्या व्यवस्थापनाचा अनुभव आणि राम मंदिराच्या व्यवस्था आणखी सुधारण्याबाबतच्या योजनेबाबत प्रश्न विचारले गेले.

-मुलाखतीत उमेदवारांची राम मंदिर आणि भगवान श्रीरामाप्रती असलेली आस्था देखील तपासली गेली.

-त्यांना धार्मिक संस्थांच्या व्यवस्थापनाचा पूर्वीचा अनुभव आणि मंदिर व्यवस्थापनाबाबतच्या त्यांच्या दृष्टिकोनाबाबतही प्रश्न विचारले गेले.

-त्यांच्या CV मधील तपशीलांबद्दल विचारले गेले आणि त्यांच्या आवडी-निवडीबाबतही प्रश्न विचारले गेले.

-उमेदवारांकडे विचारले गेले की ते जाणवं घालतात का आणि शुद्ध शाकाहारी आहेत की मांसाहारी आहार करतात.

-याशिवाय दारू पिण्याबाबत आणि हिंदू धार्मिक परंपरेनुसार पोशाख परिधान करण्याबाबत प्रश्न विचारले गेले.

-उमेदवारांकडे त्यांच्या कुटुंबाबद्दल आणि मोठ्या धार्मिक कार्यक्रमांतील गर्दी व्यवस्थापनाबाबतही माहिती मागितली गेली.

२ सप्टेंबरला CEO ची घोषणा

मुलाखतींच्या पुढील फेरी आजही सुरू राहणार आहे. समितीला २ सप्टेंबरपर्यंत तीन नावांचा पॅनेल राम मंदिर ट्रस्टला सादर करायचा आहे. त्यानंतर ट्रस्टची कार्यकारी समिती अंतिम तीन उमेदवारांमधून CEO ची निवड करेल आणि राम मंदिराच्या CEO ची घोषणा केली जाईल.

CEO हा मंदिर ट्रस्टचा सर्वोच्च कार्यकारी अधिकारी असेल आणि त्याच्या जबाबदारीत प्रशासकीय, आर्थिक, कायदेशीर, सुरक्षा आणि भक्तांच्या व्यवस्थांशी संबंधित मोठे निर्णय असतील.

राम मंदिरात दान चोरीचा प्रकार उघडकीस आल्यानंतर ट्रस्टने CEO नेमण्याचा निर्णय घेतला आहे. CEO च्या निवडीसाठी तीन सदस्यीय विशेष समिती स्थापन करण्यात आली आहे. या समितीमध्ये निवृत्त न्यायाधीश प्रमोद कोहली, माजी वैज्ञानिक डॉ. सुरेश हावडे आणि निवृत्त लेफ्टनंट जनरल विष्णुकान्त चतुर्वेदी यांचा समावेश आहे.