तिला हॉटेलवर नेलं, जेवणात गुंगीचं औषध टाकलं अन्… तरुणाने ओलांडल्या सर्व मर्यादा, नंतर थेट Video पाठवला

नात्याला काळीमा फासणारी एक धक्कादायक घटना समोर आली आहे. एका तरुणाने २० वर्षीय महाविद्यालयीन विद्यार्थिनीसोबत प्रेमाचे नाटक केले. तिला हॉटेलमध्ये नेले आणि लग्नाचे आमिष दाखवून आधी तिच्या भांगेत कुंकू भरले. नंतर आता आपण पती-पत्नी आहोत असे सांगून तिचा विश्वास संपादन केला. त्यानंतर तिला गुंगीचे औषध देऊन हॉटेलमध्ये तिच्यावर बलात्कार केल्याचा आरोप आहे. एवढेच नाही, तर आरोपीने तरुणीचे अश्लील फोटो आणि व्हिडीओ काढून तिला अनेक दिवस ब्लॅकमेल केले आणि शेवटी ते सोशल मीडियावर व्हायरल देखील केले. पीडितेच्या तक्रारीवरून पडाव पोलीस ठाण्यात गुन्हा दाखल करण्यात आला असून आरोपीच्या शोधासाठी पोलिसांकडून सातत्याने धाडी टाकल्या जात आहेत.

हॉटेलमध्ये नेलं अन्…

मिळालेल्या माहितीनुसार, मध्य प्रदेशातील ग्वाल्हेरच्या पडाव पोलीस ठाण्याच्या हद्दीत राहणारी ही तरुणी एका खाजगी महाविद्यालयात शिक्षण घेत आहे. काही काळापूर्वी तिची ओळख मुरैना जिल्ह्यातील कैलारस येथील रहिवासी अभिषेक जादौन याच्याशी झाली होती. दोघांमध्ये हळूहळू संवाद वाढला आणि मैत्रीचे रूपांतर प्रेमात झाले. याच दरम्यान आरोपीने तरुणीला लग्नाचा प्रस्ताव दिला. तरुणीने त्याच्यावर विश्वास ठेवून हे नाते स्वीकारले. अभिषेकने लग्नाचे आमिष दाखवून तरुणीला फिरण्याच्या बहाण्याने उत्तर प्रदेशातील वृंदावन येथे नेले, असा आरोप आहे. तिथे दोघे एका हॉटेलमध्ये सुमारे पाच दिवस राहिले. याच वेळी आरोपीने तरुणीच्या भांगेत कुंकू भरून स्वतःला तिचा पती असल्याचे घोषित केले आणि लवकरच सामाजिक रितीरिवाजांनुसार लग्न करण्याचे आश्वासन दिले.

पीडितेचा आरोप आहे की, विश्वास संपादन केल्यानंतर आरोपीने तिच्या जेवणात गुंगीचे औषध मिसळले. बेशुद्धावस्थेत त्याने तरुणीवर बलात्कार केला आणि यादरम्यान तिचे आक्षेपार्ह फोटो व व्हिडीओही मोबाईलमध्ये रेकॉर्ड करून घेतले. वृंदावनहून परतल्यानंतर आरोपीचे वागणे पूर्णपणे बदलले. तो फोटो आणि व्हिडीओ व्हायरल करण्याची धमकी देऊन तरुणीला ब्लॅकमेल करू लागला.

कुटुंबियांनी केली पोलिसात तक्रार

असे सांगितले जाते की, आरोपीने ग्वाल्हेरच्या हॉटेल अंबिकासह अनेक ठिकाणी तरुणीचे शारीरिक शोषण केले. जेव्हा तरुणी आणि तिच्या कुटुंबाने आरोपीवर लग्नासाठी दबाव टाकला, तेव्हा त्याने स्पष्ट नकार दिला. त्यानंतर २० एप्रिल रोजी आरोपीने तरुणीचे अश्लील फोटो आणि व्हिडीओ सोशल मीडियावर अपलोड करून व्हायरल केले. या प्रकरणाचे गांभीर्य लक्षात घेऊन पोलिसांनी आरोपी अभिषेक जादौन याच्याविरुद्ध बलात्कार, ब्लॅकमेलिंग आणि आयटी कायद्याच्या (IT Act) विविध कलमांतर्गत गुन्हा दाखल केला आहे.