मोठी बातमी! युद्धविरामाची चर्चा फिस्कटणार? अमेरिकेचा इराणला जबर धक्का, ज्याची भीती होती तेच घडलं

अमेरिका, इस्त्रायल आणि इराणमध्ये मोठं युद्ध झालं, या युद्धामुळे मध्यपूर्वेत मोठा तणाव पहायला मिळत आहे. अखेर युद्धाच्या 40 व्या दिवशी अमेरिका आणि इराणकडून युद्धविरामाची घोषणा करण्यात आली आहे. दोन आठवड्यांसाठी हा युद्धविराम असणार आहे. या युद्धविरामासाठी पाकिस्तानने पुढाकार घेतला. पाकिस्तानच्या मध्यस्थीनंतर दोन्ही देशांकडून युद्धविरामाची घोषणा करण्यात आली. दरम्यान आता पाकिस्तानच्या इस्लामाबादमध्ये अमेरिका आणि इराणमध्ये शांतीवार्ता सुरू आहे.  यापूर्वीच इराणने आपल्या काही अटी अमेरिकेपुढे ठेवल्या होत्या. अमेरिकेकडून आखाती देशात असलेली इराणची संपत्ती जप्त करण्यात आली आहे, ती संपत्ती मुक्त करावी आणि इस्त्रायलकडून लेबनॉनवर सुरू असलेले हल्ले तातडीने थांबवावेत अशी मागणी इराणकडून करण्यात आली होती.

मात्र शांती वार्त सुरू असतानाच आता अमेरिकेनं इराणला मोठा धक्का दिला आहे. समोर आलेल्या माहितीनुसार अमेरिकेनं इराणची जप्त केलेली संपत्ती सोडण्यास नकार दिला आहे. त्यामुळे आता पाकिस्तानात दोन्ही देशांमध्ये सुरू असलेली शांती वार्ता फिस्कटण्याची भीती व्यक्त केली जात आहे. अमेरिकेनं इराणची संपत्ती मुक्त करण्यास नकार दिला असून, हा इराणसाठी मोठा धक्का मानला जात आहे.

स्ट्रीट ऑफ होर्मूज अजूनही बंदच 

दरम्यान अमेरिका आणि इराण दोन्ही देशांकडून युद्धविरामची घोषणा करण्यात आली आहे. युद्धविरामाची घोषणा करतानाच अमेरिकेनं इराणसमोर स्ट्रीट ऑफ होर्मूज तातडीनं सुरू करण्याची अट ठेवली होती. मात्र युद्धविराम होऊन देखील इराणने अजूनही स्ट्रीट ऑफ होर्मूज सुरू केलेला नाहीये. एका दिवसात या मार्गाने केवळ 15 च जहाजं जातील असं इराणने म्हटलं आहे. त्यामुळे अजूनही जगावर ऊर्जा संकट कायम आहे. तर दुसरीकडे या मुद्द्यावर आता ब्रिटनने देखील आक्रमक भूमिका घेतली आहे.

इराणने स्ट्रीट ऑफ होर्मूज अजूनही सुरू केलेलं नाही, यावर बोलताना ब्रिटनचे पंतप्रधान म्हणाले की, या संदर्भात मी डोनाल्ड ट्रम्प यांच्याशी बोललो आहे. आम्ही आता स्ट्रीट ऑफ होर्मूजवर सैन्य कारवाईचा विचार करत आहोत. जर समजा अशी कारवाई झालीच तर पुन्हा एकदा युद्धाला सुरुवात होऊ शकते.