उत्तर प्रदेशात ‘महाराष्ट्र पॅटर्न’, मोठा राजकीय उलटफेर, ओवैसी आणि चंद्रशेखर यांची तिसऱ्या आघाडीची घोषणा

उत्तर प्रदेशात पुढील वर्षी विधानसभेच्या निवडणुका होणार आहेत. या निवडणुकीपूर्वीच उत्तर प्रदेशात मोठा राजकीय उलटफेर झाला आहे. राज्यात नवीन राजकीय समीकरण उदयास आलं आहे. आझाद समाज पार्टी (कांशीराम) आणि ऑल इंडिया मजलिस-ए-इत्तेहादुल मुस्लिमीन (एमआयएम) मध्ये आघाडी झाली आहे. आझाद समाज पार्टीचे नेते चंद्रशेखर आझाद आणि एमआयएमचे नेते असदुद्दीन ओवैसी यांनी तिसऱ्या आघाडीची घोषणा केली आहे. महाराष्ट्रात ओवैसी आणि प्रकाश आंबेडकर यांनी दलित-मुस्लिमांना एकत्र आणण्याचा जो प्रयोग केला होता, तोच प्रयोग ओवैसी आणि चंद्रशेखर आझाद उत्तर प्रदेशात केला आहे. त्यामुळे उत्तर प्रदेशातील राजकीय वातावरण ढवळून निघणार आहे.

चंद्रशेखर आझाद आणि असदुद्दीन ओवैसी यांनी एकत्रित पत्रकार परिषद घेऊन नव्या आघाडीची घोषणा केली आहे. आमच्या आघाडीचं नाव ‘सामाजिक परिवर्तन मोर्चा’ असून आमची आघाडी राज्यात सत्ता परिवर्तन करणार आहे. भाजपला हरवण्यासाठी राज्यात मोठी आघाडी उभारायला हवी होती, पण काही लोकांच्या अहंकारामुळे ते घडू शकलं नाही, असं चंद्रशेखर आझाद यांनी म्हटलं आहे. यावेळी चंद्रशेखर आझाद यांनी समाजवादी पार्टी आणि काँग्रेसलाही या आघाडीत येण्याचं आमंत्रण दिलं. तसेच ही आघाडी सर्वच्या सर्व 403 जागा लढवणार आहे. चंद्रशेखर आझाद हे मुख्यमंत्रीपदाचा चेहरा असणार असल्याची घोषणाही यावेळी करण्यात आली आहे.

ही तिसरी आघाडी नसून…

ही काही तिसरी आघाडी नाहीये. तर सामाजिक बदल घडवून आणणारी आघाडी आहे. ही आघाडी मजबूत आहे. पुढे आणखी मजबूत होणार आहे. आम्ही जस जसे पुढे जाऊ तस तसे वंचित, बहुजन, पीडीत, शोषित आणि कष्टकरी वर्ग या आघाडीत सामील होतील. जे लोक अत्याचार पीडित आहेत. असह्य आहेत. ज्यांचं शोषण होत आहे, अशा लोकांसाठी ही आघाडी मोठी ताकद बनणार आहे. आम्ही या सर्व लोकांना मुख्य प्रवाहात आणणार आहोत. काही लोकांनी या वर्गाला मुख्य प्रवाहात आणण्याची घोषणा केली होती. ते आमदार, खासदार, मंत्री, मुख्यमंत्री आणि पंतप्रधान झाले. पण वंचित घटक हा नेहमी सत्ता, संपत्ती आणि प्रतिष्ठेपासून वंचितच राहिला आहे. याच घटकाला मुख्य प्रवाहात आणण्याचं काम आम्ही करणार आहोत, असं चंद्रशेखर आझाद म्हणाले.

भाजपला रोखण्यसाठीच मैदानात

यावेळी असदुद्दीन ओवैसी यांनी आम्ही सामाजिक परिवर्तन आघाडी तयार करण्याचा निर्णय घेतला आहे. भाजपला तिसऱ्यांदा सत्तेत येण्यापासून रोखण्यात आम्ही यशस्वी ठरू. आमच्या आघाडीचे मुख्यमंत्रीपदाचे उमेदवार चंद्रशेखर आझाद राहतील. आम्ही सर्वच्या सर्व 403 जागा लढणार आहोत. आम्ही 26 नोव्हेंबर रोजी मोठी रॅली आयोजित करणार आहोत. या रॅलीतूनच उत्तर प्रदेशातील सामाजिक बदलाच्या क्रांतीला सुरुवात होईल. आम्ही भविष्यातील राजकारण करणार आहोत, असं ओवैसी यांनी स्पष्ट केलं.

महाराष्ट्र पॅटर्न यशस्वी होणार?

महाराष्ट्रात प्रकाश आंबेडकर यांच्या वंचित आघाडीसोबत ओवैसी यांनी आघाडी केली होती. यावेळी या आघाडीला मोठं यश आलं होतं. छत्रपती संभाजीनगरमधून या आघाडीचा उमेदवार लोकसभेवर निवडून आला होता. राज्यात अनेक ठिकाणी या आघाडीला दलित आणि मुस्लिमांची एकगठ्ठा मते मिळाली होती. त्यामुळे या आघाडीचा सर्वाधिक फटका काँग्रेसला बसला होता. आता उत्तर प्रदेशात ओवैसी हे चंद्रशेखर आझाद यांना घेऊन तीच खेळी करत आहेत. उत्तर प्रदेशात या आघाडीचा सर्वाधिक फटका मायावती यांच्या बहुजन समाज पार्टीला बसण्याची शक्यता आहे. त्यानंतर काँग्रेस आणि समाजवादी पार्टीलाही या आघाडीचा फटका बसण्याची शक्यता असून या आघाडीमुळे भाजपला फायदाच होणार असल्याचं सांगितलं जातं.