पश्चिम बंगालमधून मोठी बातमी! या ठिकाणी पुन्हा मतदान होणार, निवडणूक आयोगाने का दिले निर्देश?

संपूर्ण देशात सध्या पश्चिम बंगाल विधानसभा निवडणुकीची चर्चा सुरू आहे. भारतीय जनता पार्टी आणि तृणमुल काँग्रेस यांच्यात सामना पहायला मिळत आहे. पश्चिम बंगालमध्ये विधानसभेसाठी मतदान पार पडले असून आता 4 मे रोजी निकाल जाहीर होणार आहे. मात्र आता त्याआधी मोठी बातमी समोर आली आहे. निवडणूक आयोगाने काही ठिकाणी पुन्हा मतदान घेण्याचे निर्देश दिले आहेत. आता उद्या म्हणजेच 2 मे रोजी हे मतदान पार पडणार आहे. याबाबत सविस्तर माहिती जाणून घेऊयात.

15 केंद्रांवर पुन्हा मतदान

निवडणूक आयोगाने पश्चिम बंगालमधील दोन महत्त्वाच्या विधानसभा मतदारसंघांतील 15 मतदान केंद्रांवर 2 मे रोजी पुन्हा मतदान घेण्याचा निर्णय घेतला आहे. हा निर्णय जिल्हास्तरावर मतदान केंद्रनिहाय अहवाल आणि तक्रारींची तपासणी केल्यानंतर घेण्यात आला आहे. सर्व बूथ दक्षिण 24 परगणा जिल्ह्यातील आहेत. मगराहाट पश्चिम विधानसभा मतदारसंघातील 11 बूथवर पुन्हा मतदान होणार आहे. याशिवाय डायमंड हार्बर विधानसभा मतदारसंघातील 4 बूथवरही पुन्हा मतदान घेतले जाणार आहे. निवडणूक आयोगाने सांगितले की, मतदानादरम्यान झालेल्या गैरप्रकारांच्या तक्रारी आल्या होत्या, याबाबत तपासणी केल्यानंतर हा निर्णय घेण्यात आला आहे.

फाल्टा विधानसभेत तपासणी सुरू

निवडणूक आयोगाने 15 मतदान केंद्रांवर पुन्हा मतदान घेण्याची घोषणा केल्यानंतर निवडणूक आयोगाने आता इतर भागांवरही लक्ष वळवले आहे. आयोगाने सांगितले की 144-फाल्टा विधानसभा मतदारसंघाशी संबंधित तक्रारी आल्या होत्या, याची तपासणी सुरू असून अहवालाची प्रतीक्षा आहे. हा अहवाल मिळाल्यानंतर त्या ठिकाणी पुन्हा मतदानाची गरज आहे का हे स्पष्ट होणार आहे.

उद्या सकाळी 7 वाजल्यापासून मतदान

निवडणूक आयोगाने दिलेल्या माहितीनुसार, 15 बुथवर उद्या सकाळी 7 वाजल्यापासून सायंकाळी 6 वाजेपर्यंत होणार आहे. याआधी झालेले वोटिंग मतदान प्रतिनिधित्व कायदा, 1951 च्या कलम 58(2) अंतर्गत रद्द करण्यात आले आहे आणि नव्याने मतदान घेण्याचे आदेश देण्यात आले आहेत. आता या मतदानासाठी आवश्यक ती तयारी केली जात आहे. मतदान शांततेत पार पडण्यासाठी योग्य ती खबरदारी घेतली जात आहे.