Sharad Pawar Meet PM Modi : शरद पवार दिल्लीत पंतप्रधान मोदींना का भेटले? राष्ट्रवादीचे प्रदेशाध्यक्ष शशिकांत शिंदे यांची पहिली प्रतिक्रिया

आज राजधानी दिल्लीत एक मोठी राजकीय घडामोड घडली. शरद पवार यांनी संसद भवनातील कार्यालयात जाऊन पंतप्रधान नरेंद्र मोदी यांची भेट घेतली. यावेळी त्यांच्या कन्या खासदार सुप्रिया सुळे सोबत होत्या. शरद पवारांच्या या भेटीनंतर राजकीय वर्तुळात विविध तर्क-वितर्क सुरु झाले आहेत. यामागे काही राजकीय कारणं आहेत का? असे अनेक प्रश्न आहेत. या भेटीवर शरदचंद्र पवार राष्ट्रवादी काँग्रेस पक्षाचे प्रदेशाध्यक्ष शशिकांत शिंदे यांनी प्रतिक्रिया दिली आहे. “काल पवारसाहेब जंतर-मंतरवर गेले होते. तिथे आंदोलकांना भेटले. 22 दिवसांपासून सुरु असलेल्या आंदोलनावर मार्ग काढण्यासाठी शरद पवारांनी पंतप्रधान मोदींची भेट घेतली असावी. मार्ग काढण्याचा प्रयत्न केला असेल” असं शशिकांत शिंदे म्हणाले.

“वेगळा अर्थ काढू नका. आंदोलनावर चर्चा होणं गरजेचं आहे” असं शशिकांत शिंदे म्हणाले. शरद पवार आणि पंतप्रधान मोदींमध्ये कुठल्या मुद्यांवर चर्चा झाली असेल यावर शशिकांत शिंदे म्हणाले की, “मला कल्पना नाही. मी बघितलय त्यानुसार शरद पवार अनुभवी नेते आहेत. त्यांनी अनेक प्रश्नांवर पुढाकार घेऊन मार्ग काढण्याचा प्रयत्न केला आहे”

काल पवार अभिजीत दीपकेंना भेटले

शरद पवार यांनी कालच जंतर-मंतरवर जाऊन आंदोलन करणाऱ्या सीजेपी कार्यकर्त्यांची भेट घेतली होती. अभिजीत दीपकेंशी स्वत: शरद पवार बोलले. आंदोलक विद्यार्थ्यांची विचारपूस केली. कारण सोमवारी आंदोलन करणाऱ्या विद्यार्थ्यांवर पोलिसांनी लाठीचार्ज केला होता. यावेळी आंदोलक विद्यार्थी आणि पोलीस दोघे जखमी झाले होते.

पवार NDA सोबत जाणार का?

शरद पवार भाजप प्रणीत राष्ट्रीय लोकशाही आघाडीमध्ये जाणार अशी सुद्धा चर्चा आहे. त्यामुळे शरद पवार आणि पंतप्रधान मोदींची भेट महत्वाची ठरते. शरद पवारांच्या राष्ट्रवादीचे नेते जयंत पाटील आणि भाजपचे नेते विनोद तावडे यांची मुंबईत एका फाईव्ह स्टार हॉटेलमध्ये भेट झाली होती. यावर जयंत पाटील यांनी स्पष्टीकरण सुद्धा दिलं होतं. शरद पवार यांचे सर्वपक्षीय मित्र आहेत. शरद पवार सध्या महाविकास आघाडीमध्ये आहेत.