Snake Facts : सापाने शेपटी मारल्यानंतर मृत्यू होतो का? काय आहे सत्य वाचा
Snake Facts : सापांबद्दल अनेक अफवा आणि समज-गैरसमज पसरवलेले आहेत. त्यापैकी एक म्हणजे, सापाने शेपटी मारली तर माणसाचे डोके प्रचंड दुखी लागते. ताप चढतो किंवा अगदी मृत्यूही ओढवू शकतो. पण हे खरं आहे का? याबाबत तज्ज्ञांचे मत काय आहे, जाणून घेऊया.
बहुतेक लोक साप पाहताक्षणी घाबरतात. कारण, काही साप विषारी असतात. ते चावल्यानंतर जीव वाचणे अनेकदा कठीण होते. मात्र सत्य वेगळे आहे. सापही माणसाला घाबरतात. मोठा आवाज किंवा जवळ येणारा धोका जाणवला की ते स्वसंरक्षणासाठी शेपटीचा वापर करतात. शेपटी हवेत फटकारून मोठा आवाज करून ते शत्रूला दूर पळवण्याचा प्रयत्न करतात.
काही लोकांना सापाच्या संपर्कानंतर (चावा किंवा फटका) डोकेदुखी किंवा ताप येतो, असे सांगितले जाते. याची कारणे मात्र वेगळी असू शकतात.
मानसिक तणाव आणि भीती: सापाचा अनुभव अतिशय भयावह असतो. यामुळे शरीरात अॅड्रेनालिन हार्मोनची पातळी वाढते, ज्यामुळे डोकेदुखी किंवा ताप येऊ शकतो. संसर्गाची शक्यता: सापाच्या शेपटीचा फटका बसला किंवा चावा घेतला तर त्वचेवर ओरखडे किंवा जखम होऊ शकते. त्यातून जीवाणूंचा संसर्ग होऊन ताप येऊ शकतो. व्यक्तिगत संवेदनशीलता: काही लोकांना किरकोळ तणाव किंवा दुखापतीनेच ताप किंवा डोकेदुखी होते.
मात्र, सापाच्या शेपटीत विष नसते. शेपटी फक्त स्वसंरक्षणाची यंत्रणा आहे, त्यामुळे तिच्या फटक्याने माणूस बेशुद्ध होत नाही, ताप येत नाही किंवा मृत्यूही होत नाही. ही स्पष्ट माहिती एका सर्प मित्राने दिली आहे.
सापाच्या शेपटीत विष नसते, त्यामुळे फटक्याने मृत्यू किंवा गंभीर आजार होण्याचा प्रश्नच नाही. लोकांनी अशा अफवांना बळी पडू नये, असे त्यांनी सांगितले होते. थोडक्यात, सापाच्या शेपटीच्या फटक्याने मृत्यू होतो ही केवळ एक अफवा आहे. सापाचा सामना झाल्यास शांत राहणे आणि गरज पडल्यास वैद्यकीय मदत घेणे हाच योग्य मार्ग आहे.
