कारमधील प्लास्टिकची बाटली बनू शकते तुमच्या जीवाचा शत्रू, धक्कादायक माहिती समोर
कारमध्ये ठेवलेली पाण्याची बाटली पिणे आरोग्यासाठी किती घातक आहे आणि यामुळे कारला आग कशी लागू शकते, याबद्दलची सविस्तर माहिती या बातमीत वाचा.
बऱ्याचदा आपण प्रवासात पाण्याची बाटली सोबत ठेवतो आणि काम संपल्यावर ती कारमध्येच विसरतो. नंतर कधीतरी तहान लागल्यावर आपण त्याच बाटलीतील पाणी पितो. जर तुम्हीही असे करत असाल, तर ही बातमी तुमच्यासाठी अत्यंत महत्त्वाची आहे. कारमध्ये ठेवलेल्या प्लास्टिकच्या बाटलीतील पाणी पिणे तुमच्या आरोग्यासाठी आणि सुरक्षिततेसाठी अत्यंत धोकादायक ठरू शकते.
बहुतेक पाण्याच्या बाटल्या पॉलिथिलीन टेरेफ्थालेट (PET) प्लास्टिकपासून बनवलेल्या असतात. जेव्हा कार उन्हात उभी असते, तेव्हा आतील तापमान खूप वाढते. या उष्णतेमुळे प्लास्टिकमधील अँटिमनी सारखी विषारी रसायने पाण्यात विरघळू लागतात.
एका अभ्यासानुसार, कोणतीही बाटली ६०°C तापमानात दीर्घकाळ राहिल्यास पाण्यातील विषारी घटकांची पातळी वाढते, जे शरीरासाठी हानिकारक असते. कारमधील गरम आणि बंदिस्त वातावरण जीवाणूंसाठी पोषक असते. 'जर्नल ऑफ वॉटर अँड हेल्थ'च्या अहवालानुसार, अशा बाटल्यांमध्ये ई. कोलाय सारखे घातक जीवाणू वेगाने वाढू शकतात. हे दूषित पाणी प्यायल्याने पोटाचे विकार किंवा इतर संसर्ग होऊ शकतात.
उष्णता आणि सूर्यप्रकाशामुळे प्लास्टिक आणि पाण्यामध्ये रासायनिक अभिक्रिया होते. यामुळे पाण्याची ताजी चव निघून जाते. त्याला एक प्रकारचा प्लास्टिकसारखा उग्र वास येऊ लागतो. जरी ते पाणी दिसायला स्वच्छ असले, तरी त्याची गुणवत्ता पूर्णपणे खालावलेली असते.
कारमध्ये ठेवलेली पारदर्शक पाण्याची बाटली एखाद्या भिंगाप्रमाणे (Magnifying Glass) काम करू शकते. सूर्यप्रकाश जेव्हा या बाटलीतून आरपार जातो, तेव्हा तो एका बिंदूवर केंद्रित होतो. जर ही प्रकाशकिरणे सीटचे कापड किंवा कागदावर पडली, तर कारमध्ये आग लागण्याची शक्यता असते.
त्यामुळे कारमध्ये प्लास्टिकच्या बाटल्या ठेवणे टाळा. नेहमी स्टील किंवा काचेच्या बाटल्यांचा वापर करा. जर प्लास्टिकची बाटली कारमध्ये राहून गरम झाली असेल, तर ते पाणी पिण्याऐवजी झाडांना टाका किंवा फेकून द्या.
