7 महिने झाले तरी सीरिजची क्रेझ कायम! नवा कंटेंट आला तरी लोकप्रियता तशीच, IMDb वर दमदार रेटिंग
फक्त सात एपिसोड्सची ही थ्रिलर वेब सीरिज प्रदर्शनाच्या जवळपास सात महिन्यांनंतरही ओटीटी प्लॅटफॉर्मवर ट्रेंडिंग यादीत आपलं स्थान टिकवून आहे. वीकेंडला काय पहावं, असा प्रश्न तुम्हाला पडला असेल तर कथेला खिळवून ठेवणारी ही सीरिज तुम्ही पाहू शकता.
ओटीटी प्लॅटफॉर्मवर दर आठवड्याला नवनवीन वेब सीरिज आणि चित्रपट प्रेक्षकांच्या भेटीला येत असतात. त्यामुळे एखादी सीरिज काही दिवसांपेक्षा जास्त काळ प्रेक्षकांमध्ये चर्चेत राहणं हीच मोठी गोष्ट आहे. मात्र एका क्राइम थ्रिलरने तब्बल सात महिन्यांनंतरही नेटफ्लिक्सवर आपली पकड कायम ठेवली आहे. अवघ्या सात एपिसोड्सची ही सीरिज सध्या पुन्हा चर्चेत आली आहे.
या सीरिजमध्ये अभिनेता इमरान हाश्मीने कस्टम सुपरिटेंडेंट अर्जुन मीना ही भूमिका साकारली आहे. मुंबई विमानतळावर सुरू असलेल्या मोठ्या तस्करीच्या नेटवर्कचा पर्दाफाश करण्याची जबाबदारी त्याच्यावर असते. आंतरराष्ट्रीय तस्करीच्या या जाळ्यामागे असलेल्या मोठ्या गुन्हेगारापर्यंत पोहोचण्यासाठी अर्जुन आणि त्याची टीम प्रयत्न करत असते. त्याचवेळी प्रत्येक टप्प्यावर त्यांच्यासमोर नवी आव्हानं आणि कथेत ट्विस्ट येतात.
या सीरिजमध्ये शरद केळकरने बडा चौधरी नावाच्या तस्करीच्या नेटवर्कच्या प्रमुखाची भूमिका साकारली आहे. त्यामुळे इमरान हाश्मी आणि शरद केळकर यांच्यातील संघर्ष हा सीरिजचा महत्त्वाचा भाग ठरतो. या सीरिजचं नाव आहे 'तस्करी : द स्मगलर्स'. याचे एकूण सात एपिसोड्स आहेत. प्रत्येक एपिसोड साधारण 38 ते 58 मिनिटांचा आहे. त्यामुळे मोठ्या कथानकात न अडकता वीकेंडला ही सीरिज सहज पूर्ण करता येते.
IMDb वर या वेब सीरिजला दहापैकी 7.1 रेटिंग मिळाली आहे. या वेब सीरिजचं दिग्दर्शन नीरज पांडे यांनी केलं आहे. यामध्ये इमरान हाश्मी आणि शरद केळकर यांच्याशिवाय नंदिश संधू, अनुराग सिन्हा, अमृता खानविलकर, झोया अफरोज, अनुजा साठे आणि जमील खान यांच्याही भूमिका आहेत.
'तस्करी: द स्मगलर्स' ही वेब सीरिज 14 जानेवारी 2026 रोजी नेटफ्लिक्सवर प्रदर्शित झाली होती. रिलीजच्या पहिल्याच आठवड्यात या सीरिजने नेटफ्लिक्सच्या नॉन-इंग्लिश टीव्ही यादीत पहिलं स्थान मिळवलं होतं. त्यानंतरही ती बराच काळ टॉप 10 मध्ये राहिली. त्यामुळे नवीन कंटेंटच्या गर्दीतही या सीरिजला मिळणारा प्रतिसाद विशेष मानला जात आहे.
