2011 च्या विश्वचषकातून युवराज सिंगला वगळण्यात येणार होतं, कारण…, गॅरी कर्स्टन यांचा गौप्यस्फोट
वनडे वर्ल्डकप 2011 स्पर्धेच्या विजयाचा शिल्पकार हा युवराज सिंग आहे. पण युवराज सिंगला संघात घेण्यावरून बरीच खलबतं झाली होती. पण युवराजला गॅरी आणि धोनीच्या पाठिंब्यामुळे संघात स्थान मिळालं. नेमकं तेव्हा काय घडलं होतं याबाबत गॅरी कर्स्टन यांनी सांगितलं आहे.
कपिल देव यांच्या नेतृत्वाखाली भारताने 1983 चा विश्वचषक जिंकला होता. त्यानंतर भारताला आणखी एक विश्वचषक जिंकण्यासाठी 28 वर्षांचा कालावधी लागला. भारताच्या विजयात अष्टपैलू युवराज सिंगने मोठी भूमिका बजावली. युवराजने गोलंदाजी आणि फलंदाजी दोन्हीमध्ये उत्कृष्ट कामगिरी केली.
2011 चा एकदिवसीय विश्वचषक जिंकून भारताने 14 वर्षे पूर्ण केली आहेत. संघाचे तत्कालीन मुख्य प्रशिक्षक गॅरी कर्स्टन यांनी त्या विश्वचषकासाठी टीम इंडियाच्या निवडीबाबत काही खुलासे केले आहेत. विशेषतः युवराज सिंगबद्दल धक्कादायक माहिती उघड केली आहे.
रेडिफ.कॉमशी बोलताना गॅरी कर्स्टन म्हणाले की, "2011 च्या विश्वचषकासाठी युवराज सिंगची निवड करणे सोपे नव्हते. 15 खेळाडूंची निवड करण्यासाठी निवडकर्त्यांमध्ये बरीच चर्चा झाली. सुदैवाने, आम्ही युवराजला संघात समाविष्ट करू शकलो."
"धोनी आणि मी दोघांनाही युवराज सिंगला विश्वचषकासाठी भारतीय संघात समाविष्ट करायचे होते. मी नेहमीच युवराजचा मोठा चाहता आहे. आमचे चांगले संबंध होते. कधीकधी तो मला खूप चिडवतो, पण मला तो खूप आवडतो.", असंही त्यांनी पुढे सांगितलं.
2011 च्या विश्वचषकात युवराज सिंगची कामगिरी खूप चांगली होती. युवराजने फलंदाजीने 362 धावा केल्या आणि गोलंदाजीत 15 विकेट्स घेतल्या. या अद्भुत कामगिरीमुळे त्याला स्पर्धेतील सर्वोत्तम खेळाडू म्हणूनही निवडण्यात आले. अंतिम सामन्यात टीम इंडियाने श्रीलंकेचा 6 विकेट्सने पराभव केला आणि 28 वर्षांनी विश्वचषक जिंकला. (सर्व फोटो- टीव्ही 9 नेटवर्क/कन्नडवरून)
