जगातील सर्वात महागडा तांदूळ कोणता? 1 किलोच्या किंमतीत येईल नवा स्मार्टफोन
तुम्हाला माहित आहे का, जगात असाही एक तांदूळ आहे ज्याची किंमत ऐकून तुम्हाला धक्का बसू शकतो. हा तांदूळ घेण्यासाठी तुम्हाला तुमचा अर्धा पगार घालावा लागू शकतो.
japanese-kinmemai-rice-5
- तांदूळ हा आपल्या आहारातील असा एक घटक आहे, ज्याशिवाय जेवण अपूर्ण असते. काश्मीरपासून कन्याकुमारीपर्यंत सर्वत्र भात आवडीने खाल्ला जातो. साधारणपणे बाजारात ५० ते १५० रुपये किलो दराने चांगला तांदूळ मिळतो. पण तुम्हाला माहित आहे का, जगात असाही एक तांदूळ आहे ज्याची किंमत ऐकून तुम्हाला धक्का बसू शकतो. हा तांदूळ घेण्यासाठी तुम्हाला तुमचा अर्धा पगार घालावा लागू शकतो.
- जपानमधील किनमेमाई प्रीमियम (Kinmemai Premium) असे या जगातील महागड्या तांदळाचे नाव आहे. हा तांदूळ जगातील सर्वात महागडा तांदूळ म्हणून ओळखला जातो. या तांदळाची केवळ किंमतच नाही, तर त्याची गुणवत्ताही जागतिक दर्जाची आहे. २०१६ मध्ये या तांदळाची जगातील सर्वात महागडा तांदूळ म्हणून गिनीज वर्ल्ड रेकॉर्डमध्ये नोंद करण्यात आली आहे.
- जेव्हा तुम्ही हा तांदूळ खरेदी करायला जाता, तेव्हा हा तांदूळ सहसा ८४० ग्रॅमच्या बॉक्समध्ये येतो. ज्यात १४० ग्रॅमची ६ छोटी पाकिटे असतात. या ८४० ग्रॅमच्या बॉक्सची किंमत सुमारे १०,८०० जपानी येन म्हणजेच अंदाजे ७,००० ते ८,००० भारतीय रुपये इतकी आहे. सध्या आंतरराष्ट्रीय बाजारात या तांदळाची किंमत १२,५०० ते १५,००० रुपये प्रति किलो दरम्यान आहे.
- हा तांदूळ कोणत्याही एका शेतात पिकत नाही. जपानमधील गुण्मा, नागानो आणि निगाता सारख्या सर्वोत्तम भागांतील ५ वेगवेगळ्या प्रीमियम जातींचे मिश्रण करून हा तांदूळ तयार केला जातो. जपानची टोयो राईस कॉर्पोरेशन हा तांदूळ तयार करते.
- त्यांच्या पेटंट तंत्रज्ञानामुळे तांदळाच्या दाण्यावरील केवळ न पचणारा मेणाचा थर काढला जातो, ज्यामुळे त्यातील सर्व पोषक तत्वे टिकून राहतात. या तांदळावरील प्रक्रिया इतकी शुद्ध असते की शिजवण्यापूर्वी हा तांदूळ धुण्याची अजिबात गरज नसते
- या तांदळात नियमित तांदळापेक्षा ६ पट जास्त ‘लिपोपॉलिसॅकराइड्स’ (LPS) असतात, जे शरीराची रोगप्रतिकारक शक्ती प्रचंड वाढवतात. शिजल्यानंतर हा भात हिऱ्यासारखा चमकतो आणि त्याची चव सामान्य भातापेक्षा अधिक गोड आणि नटी (Nutty) असते. दरवर्षी या तांदळाचे केवळ मर्यादित उत्पादन घेतले जाते, त्यामुळे श्रीमंत वर्गात आणि आलिशान रेस्टॉरंट्समध्ये याला मोठी मागणी असते.
