RSSचा बालेकिल्ला असलेल्या नागपूरमध्ये BJPला पराभूत करुन काँग्रेसवरील ‘शून्याचा टॅग’ हटवणारे अभिजित वंजारी कोण?
Abhijit Vanjari: 2020 च्या निवडणुकीतही काँग्रेसचे अभिजीत वंजारी भाजपचे उमेदवार संदीप जोशी यांचा पराभव केला होता. अभिजीत वंजारी यांना 61701 मत मिळाली होती. तर संदीप जोशी यांना 42791 मते मिळाली होती. आता 2026मध्ये देखील अभिजीत वंजारी यांनी विजय मिळवला आहे.
विधान परिषदेच्या निवडणुकीत अखेर काँग्रेस पक्षाचे खाते उघडले आहे. काँग्रेसचे अभिजीत वंजारी यांनी महाराष्ट्रातील नागपूर पदवीधर मतदारसंघातून शानदार विजय मिळवला आहे. अभिजीत वंजारी यांनी भाजपचे उमेदवार सुधाकर कोहळे यांचा मोठ्या मताधिक्याने पराभव केला आहे. हा विजय काँग्रेससाठी महत्त्वपूर्ण राजकीय यश म्हणून पाहिले जात आहे. तर भाजपसाठी हा निकाल नागपूर आणि विदर्भातील आपली राजकीय स्थिती तपासून पाहण्याचे संकेत मानले जाऊ शकतात. अभिजीत वंजारी यांचा हा सलग दुसरा विजय आहे. २०२० मध्येही अभिजीत वंजारी यांनी नागपूर पदवीधर मतदारसंघातून निवडणूक जिंकली होती. व्यवसायाने वकील असलेल्या अभिजीत वंजारी यांची सुरुवात विद्यार्थी राजकारणातून झाली होती.
अभिजीत वंजारी कोण आहेत?
अभिजीत वंजारी यांना राजकारण वारसाहक्काने मिळाले आहे. ते नागपूरच्या एका राजकीय कुटुंबातील आहेत. अभिजीत वंजारी यांचे वडील गोविंदराव मारोतराव वंजारी दक्षिण नागपूर विधानसभा मतदारसंघातून दोन वेळा आमदार होते. वडिलांच्या पावलावर पाऊल ठेवत अभिजीत वंजारी यांनीही राजकारणाचा मार्ग स्वीकारला. अभिजीत वंजारी यांनी राष्ट्रसंत तुकडोजी महाराज नागपूर विद्यापीठातून पदवी (बीए) आणि कायद्याची पदवी (एलएलबी) पूर्ण केली आहे. ते नागपूर विद्यापीठाच्या सिनेट आणि व्यवस्थापन परिषदेचे सदस्यही राहिले आहेत. अभिजीत वंजारी यांनी आपल्या राजकीय कारकिर्दीची सुरुवात विद्यार्थी राजकारणातून केली होती. ते १९९८ ते २००२ पर्यंत महाराष्ट्र प्रदेश एनएसयूआय (NSUI) चे महामंत्री होते. त्यानंतर त्यांना महाराष्ट्र प्रदेश युवक काँग्रेसच्या सचिवपदाची जबाबदारी मिळाली. शिवाय उत्तर प्रदेश आणि बिहारसारख्या राज्यांत काँग्रेसचे निवडणूक पर्यवेक्षक म्हणूनही ते काम करत आले आहेत. महाराष्ट्राच्या राजकारणात अभिजीत वंजारी काँग्रेसचे दीर्घकाळचे उमेदवार म्हणून दिसून येतात.
अभिजीत वंजारी यांच्याशी संबंधित खास गोष्टी
- जन्म: १० मे १९७३
- जन्मस्थान: नागपूर, महाराष्ट्र
- वडील: स्वर्गीय गोविंदराव मारोतराव वंजारी (काँग्रेसचे नेते आणि दक्षिण नागपूरचे दोन वेळा आमदार)
- शिक्षण: अभिजीत वंजारी यांनी नागपूर विद्यापीठातून बीए आणि एलएलबीची पदवी घेतली.
- ते व्यवसायात वकील आहेत.
- राजकीय प्रवास: १९९८–२००२ मध्ये महाराष्ट्र प्रदेश NSUI चे महामंत्री. त्यानंतर महाराष्ट्र प्रदेश युवक काँग्रेसचे सचिव झाले.
- नागपूर जिल्हा काँग्रेस समितीमध्ये महामंत्री आणि प्रवक्ता म्हणूनही जबाबदारी सांभाळली.
- डिसेंबर २०२० मध्ये त्यांनी नागपूर पदवीधर मतदारसंघातून विधान परिषदेची निवडणूक जिंकली होती.
- ऑक्टोबर २०२६ मध्ये दुसरा विजय.
काँग्रेससाठी हा विजय का महत्त्वाचा आहे?
नागपूर पदवीधर मतदारसंघाची निवडणूक महाराष्ट्राच्या राजकारणात विशेष महत्त्वाची आहे. हा भाग आरएसएसचा बालेकिल्ला मानला जातो. अशा ठिकाणी इतर कोणत्याही पक्षाचा विजय होणे हे मोठे संकेत आहेत. या मतदारसंघात पदवीधर मतदार आपल्या प्रतिनिधीची निवड करतात. त्यामुळे येथील निवडणूक केवळ राजकीय पक्षांच्या लोकप्रियतेपुरती मर्यादित न राहता, शिक्षित वर्गातील त्यांची स्वीकार्यता, स्थानिक मुद्दे आणि उमेदवारांची वैयक्तिक प्रतिमा यांचीही परीक्षा मानली जाते. येथून अभिजीत वंजारी यांचा विजय काँग्रेससाठी अनेक बाबतीत महत्त्वपूर्ण आहे. महाराष्ट्राच्या राजकारणात भाजप आणि काँग्रेस यांच्यातील स्पर्धा सतत चर्चेचा विषय राहिली आहे. अशा परिस्थितीत भाजपच्या उमेदवाराला हरवून विधान परिषदेची जागा जिंकणे काँग्रेससाठी आपला राजकीय पाया मजबूत करण्याची संधी आहे.
