मोठी बातमी! राज ठाकरेंना धक्का, मनसेच्या नेत्यानं सोडली साथ, काँग्रेसमध्ये मोठा पक्षप्रवेश

राजकीय वर्तुळातून मोठी बातमी समोर येत आहे. मनसेला मोठा धक्का बसला आहे. रणजित शिरोळे यांनी मनसेची साथ सोडली आहे. त्यांनी काँग्रेसमध्ये पक्ष प्रवेश केला आहे. हा पुण्यामध्ये महाराष्ट्र नवनिर्माण सेनेसाठी मोठा धक्का मानला जात आहे. मनसेचे राज्य सरचिटणीस म्हणून देखील रणजित शिरोळे यांनी पक्षाचं काम केलं होतं. मात्र त्यानंतर आता त्यांनी काँग्रेसमध्ये प्रवेश करण्याचा निर्णय घेतला आहे. त्यांनी 2009 मध्ये मनसेकडून लोकसभा निवडणूक देखील लढवली होती. रणजित शिरोळे यांनी काँग्रेसचे प्रदेशाध्यक्ष हर्षवर्धन सपकाळ यांच्या उपस्थितीमध्ये काँग्रेसमध्ये प्रवेश केला आहे.

कोण आहेत रणजित शिरोळे? 

रणजित शिरोळे हे पुण्यातील मनसेचे एक प्रमुख नेते आहेत. त्यांनी  मनसेचे राज्य सरचिटणीस म्हणून देखील पक्षाचं काम पाहिलं आहे. त्यांनी 2024 मध्ये आपल्या पदाचा राजीनामा दिला होता.  रणजित शिरोळे हे मनसेच्या स्थापनेपासून पक्षासोबत होते.  पुण्यातील शिवाजीनगर विधानसभा मतदारसंघात त्यांनी पक्षाचं काम केलं.  मार्च 2023  मध्ये राज ठाकरे यांनी त्यांची मनसेच्या राज्य सरचिटणीसपदी नियुक्ती केली होती. एवढंच नाही तर 2009 मध्ये मनसेने त्यांना पुणे लोकसभा मतदारसंघामधून उमेदवारी देखील दिली होती. या निवडणुकीमध्ये त्यांना 75  हजार मतं पडली होती. ते या मतदारसंघामधून तिसऱ्या क्रमांकाचे उमेदवार होते.

रणजित शिरोळे यांचे वडील. पुणे महानगरपालिकेच्या स्थायी समितीचे अध्यक्ष होते. ते काँग्रेसमध्ये होते. दरम्यान या पक्षप्रवेशावर प्रतिक्रिया देताना रणजित शिरोळे यांनी म्हटलं की, या पक्षाशी माझ्या कुटुंबाचे जुनेच संबंध आहेत.  एक व्यक्ती म्हणून काम करायचं आहे, त्यासाठी मी आता काँग्रेस हे माध्यम निवडलं आहे.  देशाच्या जडणघडणीत या पक्षाचं मोठं योगदान आहे. आज ज्या पद्धतीने राहुल गांधी यांनी वादळ उभे केले आहे, त्या वादळाचा एक भाग होण्याचा प्रयत्न करणार आहे. त्यात मी आता जोडलो गेलो आहे आता पक्षाचे काम करेल, पक्ष जास्तीत जास्त लोकापर्यंत पोहोचवण्याचा प्रयत्न करेल असं यावेळी सिरोळे यांनी म्हटलं आहे. दरम्यान हा  मनसेसाठी मोठा धक्का मानला जात आहे.