‘एकनाथ शिंदे सीएम झाले आणि आमची संधी घालवली’, बाळासाहेब थोरात यांनी उद्विग्नता बोलून दाखवलीच

नाशिक : महाराष्ट्रात सत्तांतराला (Maharashtra Political Crisis) आता नऊ महिने होत आले आहेत. असं असताना महाविकास आघाडीच्या (Maha Vikas Aghadi) नेत्यांमध्ये सरकार पडल्याचं शल्य अजूनही जीवंत आहे. त्यामुळे महाविकास आघाडीचे नेते वारंवार त्या मुद्द्यावरुन भाजप (BJP) आणि शिवसेनेवर (Shiv Sena) टीका करत असतात. विशेष म्हणजे आज अनोखी गोष्ट बघायला मिळाली. मुख्यमंत्री एकनाथ शिंदे (Eknath Shinde) मंचावर बसलेले असताना काँग्रेसचे दिग्गज नेते बाळासाहेब थोरात यांनी आपल्या मनातील सल बोलून दाखवली. एकनाथ शिंदे मुख्यमंत्री झाले आणि आमची संधी घालवली, असं बाळासाहेब थोरात म्हणाले.

बाळासाहेब थोरात हे महाराष्ट्राच्या राजकीय संस्कृती विषयी बोलत होते. भाजपचे दिवंगत नेते गोपीनाथ मुंडे आणि काँग्रेसचे दिवंगत नेते विलासराव देशमुख यांच्या मैत्रीविषयी ते बोलले. यावेळी त्यांनी आपल्या मनातील उद्विग्नता व्यक्त केली. पण त्यानंतर त्यांनी एकनाथ शिंदे यांच्या कामांची चांगलीच प्रशंसा केली.

नाशिकच्या सिन्नर तालुक्यातील नांदुर शिंगोटे येथे गोपीनाथ मुंडे यांच्या स्मारकाचे आणि पूर्णाकृती पुतळ्याचा लोकार्पण सोहळा आज पार पडला. या कार्यक्रमाला केंद्रीय मंत्री नितीन गडकरी, मुख्यमंत्री एकनाथ शिंदे, केंद्रीय मंत्री भारती पवार, पंकजा मुंडे, छगन भुजबळ, राधाकृष्ण विखे पाटील, बाळासाहेब थोरात, दादा भुसे यांच्यासह राज्यातील विविध नेते यावेळी उपस्थित आहे. याच कार्यक्रमात बाळासाहेब थोरात बोलत होते.

बाळासाहेब थोरात नेमकं काय म्हणाले?

“एकनाथ शिंदे साहेब आपण मुख्यमंत्री आहात. संधी मिळालेली आहे. काम करताय. आमची संधी घालवली हे खरंय. पण गडी मेहनती आहे हे विसरुन जाता येत नाही. जो काही वेळ मिळाला आहे, जी संधी मिळाली आहे ती त्या संधीत जास्तीत जास्त लोकांपर्यंत काम करण्याचा प्रयत्न आपण करत आहात ते आम्ही मनापासून पाहतोय ते नाकारता येत नाही”, अशा शब्दांत बाळासाहेब थोरात यांनी एकनाथ शिंदे यांचं कौतुक केलं.

“हे सगळं जे लोकशाहीत आहे ते आपण सर्वसामान्यांच्या आयुष्यात आनंद निर्माण करण्याकरता आपण करत असतो. तो आनंद निर्माण करण्याची जबाबादारी लोकशाहीने सर्व पक्षांना दिली तशी आपल्यावरही दिलेली आहे. शेवटी ते कार्य आपण एकत्रित करणं हे खरं महत्त्वाचं आहे. त्यामध्ये गोपीनाथ मुंडे यांचा आदर्श आपल्यासमोर असला पाहिजे. पंकजा ताई त्यांचा समर्थ वारसा पुढे नेत आहेत याचं आम्हाला कौतुक आहे”, असंदेखील बाळासाहेब थोरात यावेळी म्हणाले.