मिरजेत मध्यरात्री हॉटेलचं पाडकाम, गोपीचंद पडळकर यांच्या भावावर गंभीर आरोप, स्थानिकांचा अल्टिमेटम

मिरज : सांगलीतील मिरजमध्ये मध्यरात्री पाडकाम करण्यात आलं. मध्यरात्री दोन वाजता एसटी स्टॅन्डजवळ हे पाडकाम करण्यात आलं आहे. या पाडकामावर स्थानिकांनी आक्षेप घेतला आहे. भाजपचे विधान परिषदेतेचे आमदार गोपीचंद पडळकर (Gopichand Padalkar) यांचे बंधू ब्रह्मानंद पडळकर (Brahmanand Padalkar) यांच्या विरोधात स्थानिक आक्रमक झाले आहेत.

“सांगली जिल्ह्याचे पालकमंत्री सुरेश खाडे आमचे आमदार आहेत. त्यांनी जाहीर करावं की या कृत्यामध्ये त्यांचाही सहभाग आहे का? जर खाडे यांचा या प्रकरणाशी संबंध नसेल तर गोपीचंद पडळकर, ब्रम्हानंद पडळकर आणि त्यांच्यासोबत आलेले दीड-दोन हजार गुंड या सगळ्यांवर योग्य त्या कलमानुसार गुन्हे दाखल करण्याची मागणी करतो”, असं स्थानिक नागरिकांची मागणी आहे.

जर आज दुपारी 12 वाजेच्या आधी या सगळ्यांवर गुन्हे दाखल झाले नाहीत तर आम्ही सगळे लोक आमच्या कुटुंबासह सुरेश खाडे यांच्या कार्यालयाबाहेर उपोषण करू, असा इशारा स्थानिक नागरिकांनी दिला आहे.

या सगळ्या प्रकरणवर आम्ही गोपीचंद पडळकर यांच्याशी फोनवरून बातचित केली. त्यावर त्यांनी आपली प्रतिक्रिया दिली आहे. मिरजेत दुकानं पाडण्यात आली आहेत. ते पाडकाम कायदेशीर आहेत, असं आमदार गोपीचंद पडळकर यांनी फोनवरून सांगितलं.

चार हॉटेल काल रात्री पाडण्यात आलेत. या ठिकाणी 4 जेसीबींच्या सहाय्याने हे पाडकाम करण्यात आलंय. या पाडकामावरून नागरिक अतिशय आक्रमक झाले आहेत.

आमदार गोपीचंद पडळकर आणि त्यांचे भाऊ ब्राह्मनंद पडळकर यांनी जे बांधकाम पाडले आहे ते चुकीचं आहे, असा आरोप करण्यात आला आहे. त्यांच्यावर गुन्हा दाखल करावा, अशी मागणी संतप्त नागरिक करत आहेत. मिरजमधील वातावरण सध्या चांगलंच तापलं आहे. त्यामुळे मोठा पोलीस बंदोबस्त या ठिकाणी तैनात करण्यात आला आहे.