“आमच्या लोकांना हजार रुपये देऊन शिंदेंच्या दसरा मेळाव्याला नेलंय”, शिवाजी पार्कवर शिवसैनिकांचा त्रागा

मुंबई : आज शिवसेनेसाठी अत्यंत महत्वाचा दिवस आहे. एकनाथ शिंदे यांनी आपल्या समर्थक आमदारांसह बंडखोरी केली. त्यानंतर होणारा हा पहिला दसरा मेळावा आहे. त्यामुळे या मेळाव्यात आरोप प्रत्यारोपांच्या फैरी झडणार हे निश्चित आहे. मुख्यमंत्री एकनाथ शिंदे (Eknath Shinde) यांनी पैसे देऊन लोकांना मेळाव्याला आणल्याचा आरोप शिवसैनिकांनी अनेकदा केला. पण आता त्यांनी काही पुरावे दाखवत शिंदेंवर आरोप केले आहेत. “आमच्या लोकांना हजार रुपये देऊन शिंदेंच्या दसरा मेळाव्याला नेलंय”, असं हे शिवसैनिक (Uddhav Thackeray) म्हणत आहेत.

एकनाथ शिंदे यांनी सभेला येण्यासाठी एक हजार रुपये दिल्याचा गंभीर आरोप शिवसैनिकांनी केला आहे. त्याची व्हीडिओ क्लिपही या शिवसैनिकांनी दाखवली.

कोल्हापूरचे शिवसैनिक दसरा मेळाव्यासाठी मुंबईत आलेत. सभेच्या आधी हे सगळे शिवसैनिक शिवाजी पार्कमध्ये दाखल झालेत. त्यांनी आपल्या भागातील शिवसैनिकाला फोन लावला. त्यांच्यातील संभाषण या शिवसैनिकांनी टीव्ही 9 मराठीच्या प्रतिनिधींना ऐकवली.

शिवेसेनेचे नेते आणि विधान परिषदेचे विरोधी पक्षनेते अंबादास दानवे यांनीही एकनाथ शिंदे यांच्या मेळाव्यावर टीका केली आहे. अमित शहांच्या ताटाखालच्या मांजराचा हा दसरा मेळावा आहे, अशा शब्दात दानवे यांनी एकनाथ शिंदेवर घणाघाती टीका केली आहे. आमचा दसरा मेळावा हा या गद्दारांच्या पिकाचा नायनाट करण्यासाठी आहे. पुढच्या दसरा मेळाव्यापर्यंत हे या राक्षसांचा नायनाट झालेला असेल, असं दानवे म्हणालेत.

तर दुसरीकडे निलेश राणे यांनी ट्विट करत उद्धव ठाकरेंच्या दसरा मेळाव्यावर टीका केली आहे. चलो शिवाजी पार्क…, असं म्हणत त्यांनी राष्ट्रवादीची टोपी घातलेला एक फोटो शेअर केला आहे.

चलो शिवाजी पार्क… pic.twitter.com/jM8lOSnKqe

— Nilesh N Rane (@meNeeleshNRane) October 5, 2022