NDA सोबत युती करून चूक, संधी मिळताच…महादेव जानकरांनी थेट जाहीर केलं; नेमकं काय म्हणाले?

पुण्याश्लोक अहिल्याबाई होळकर यांच्या जयंतीनिमित्त राज्यात ठिकठिकाणी कार्यक्रम आयोजित करण्यात आले. अहिल्याबाईंचे जन्मस्थळ असलेल्या श्रीक्षेत्र चौंडी येथेदेखील मोठा कार्यक्रम घेण्यात आला. या कार्यक्रमाला मुख्यमंत्री देवेंद्र फडणवीस, उपमुख्यमंत्री एकनाथ शिंदे यांनी हजेरी लावली. असाच एक कार्यक्रम दिल्लीतही घेण्यात आला. या कार्यक्रमत राष्ट्रीय समाज पक्षाचे नेते महादेव जानकर यांनी केलेल्या विधानाची चांगलीच चर्चा होत आहे. एनडीएसोबत आम्ही युती केली ही आमची चूक होती, असे जानकर यांनी म्हटलंय.

राष्ट्रीय समाज पक्षातर्फे नवी दिल्ललीच्या तालकटोरा स्टेडियमवर पुण्यश्लोक अहिल्यादेवी होलकर त्रिशताब्दी जयंती उत्सव साजरा करण्यात आला. यावेळी जानकर भाषण करत होते. याच भाषणादरम्यान त्यांनी आपली आगामी रणनीती सांगितली. मेल्यानंतर माझ्या मृतदेहावर दिल्लीत अंत्यसंस्कार झाले पाहिजेत. हे माझं उद्दीष्ट आहे, असेही जानकर म्हणाले.

यापूर्वी तुम्ही आम्हाला विचारात नव्हते

समाजवादी पार्टीचे अखिलेश यादव, खासदार राहुल गांधी, खासदार शरद पवार या कार्यक्रमाला आले नाहीत, म्हणून अनेकांच्या मनात शंका आहे. पण जो होता हैं अच्छे के लिये होता हैं, असं मत जानकर यांनी व्यक्त केलं. तसेच मागच्या वेळी आम्ही NDA सोबत होतो. सपकाळ साहेब (काँग्रेसचे प्रदेशाध्यक्ष) आपला पक्ष मोठा होता, म्हणून यापूर्वी तुम्ही आम्हाला विचारात नव्हते, अशी खंतही त्यांनी व्यक्त केली.

त्या दिवशी मी अमेरिकेत जयंती साजरी करेल

ज्या दिवशी केंद्रातील सरकार दिल्लीत अहिल्यादेवी होळकर यांची जयंती साजरी करेल त्या दिवशी मी अमेरिकेत जयंती साजरी करेल. अहिल्याबाई होळकर यांची जयंती हे तर फक्त औचित्य आहे. खरं तर आम्हाला दिल्लीत सरकार आणायचं आहे. एक दिवस लाल किल्ल्यावरून आपलं भाषण झालं पाहिजे हा माझा संकल्प आहे, असा विश्वास त्यांनी यावेळी व्यक्त केला.

माझ्यावर दिल्लीत अंत्यसंस्कार झाले पाहिजेत

माझ्या मृत्यूनंतर माझ्यावर दिल्लीत अंत्यसंस्कार झाले पाहिजे, हे माझे उद्दीष्ट आहे. आम्ही एनडीएसोबत युती केली, ती आमची चूक होती. पण ज्या दिवशी संधी मिळेल त्या दिवशी आम्ही त्यांना सत्तेतून बाहेर काढू, असा इशाराच जानकरा यांनी दिला.