Nanded : नितेश राणेंच्या ‘त्या’ वक्तव्याचा शिवसेनेकडून समाचार, ‘चायना आयटम’ म्हणूनच हिणवले

नांदेड : (Balasaheb Thackeray) हिंदुहृदयसम्राट बाळासाहेब ठाकरे यांचे विचार कायम ठेवण्यासाठी बंड करुन भाजपशी युती केल्याचे शिंदे गटाच्या आमदारांनी कायम सांगितले आहे. स्व. बाळासाहेब ठाकरे हेच हिंदुहृदयसम्राट अशीच सर्वांची भावना असताना आता (Nitesh Rane) नितेश राणे यांनी देवेंद्र फडणवीस यांचाच उल्लेख हा हिंदुहृदयसम्राट म्हणून केला आहे. त्यावरुन नितेश राणे हे टीकेचे धनी ठरत आहे. नांदेड येथे आयोजित शिवसेनेच्या मेळाव्यातही नितेश राणे यांच्या त्या वक्तव्यावरुन टीकेचे बाण सोडण्यात आले. (Nanded) शिवसेना संपर्क प्रमुख बबन थोरात यांनी तर नितेश राणे म्हणजे ‘चायना आयटम’ असल्याचेच सांगितले. त्यामुळे शिवसेना भाजप यांच्यातील मतभेद हे दिवसेंदिवस वाढत असल्याचे चित्र राजकीय वर्तुळात आहे.

नेमका प्रकार काय ?

शिवसेनेला हिंदूत्वाचा विसर पडल्याचा आरोप सातत्याने भाजपाकडून केला जात आहे. शिवाय खरे हिंदूत्व हे भाजप पक्ष जोपासत असल्याचे वारंवार दाखवून देण्यात आले आहे. त्यामुळे भाजपाच्या एका कार्यक्रमात नितेश राणे यांनी तर हिंदुहृदयसम्राट म्हणून चक्क उपमुख्यमंत्री देवेंद्र फडणवीस यांचाच उल्लेख केला. गेल्या काही दिवसांमधील देवेंद्र फडणवीस यांचे कार्य पाहिले तर तेच खरे हिंदुहृदयसम्राट असेही राणे म्हणाले होते.

शिवसेनेनेच मुंबईचे हित जोपासले

सध्याचे राजकारण केवळ मुंबई महापालिका निवडणुका डोळ्यासमोर ठेऊन केले जात आहे. पण गेल्या 25 वर्षापासून शिवसैनिकच मुंबईच्या हितासाठी रात्रीचा दिवस करीत आहे. त्यामुळे मुंबईकर आणि शिवसेना हे वेगळे नाते आहे. कुणीही ते तोडण्याचा प्रयत्न केला तरी जनतेला आपले हित कशामध्ये आहे, याची जाणीव असल्याचे बबन थोरात यांनी सांगितले. तर मुंबई महापालिकेवर पुन्हा भगवाच फडणार असल्याचेही ते म्हणाले.

एकच नारा, गद्दारांना धडा

पक्ष संघटन आणि कठीण परस्थितीमध्ये मजबूतीकरण यासाठी शिवसेनेकडून स्थानिक पातळीवरही लक्ष केंद्रीत करण्यात आले आहे. त्याअनुषंगानेच नांदेडमध्ये कार्यकर्त्यांचा मेळावा पार पडला आहे. मेळाव्यात गद्दारांना धडा शिकवण्यासाठी सदैव तत्पर राहण्याचा सल्लाच थोरात यांनी दिला आहे. शिवसेनेतून बंड केलेल्या आमदारांचा उल्लेख हा गद्दार म्हणून केला जात आहे.