पालघरमध्ये भाजपचा शिवसेनेसह शिंदे गटालाही धक्का! फडणवीसांच्या उपस्थितीत पालघरच्या ‘या’ 2 दिग्गज नेत्यांचा भाजपात प्रवेश

मोहम्मद हुसेन खान, पालघर : पालघरमधून मोठी राजकीय घडामोड (Maharashtra Politics) समोर येते आहे. भाजपने (BJP) शिवसेनेसह शिंदे गटाला पालघरमध्ये जोरदार धक्का दिल्याची चर्चा राजकीय वर्तुळात रंगलीय. पालघरमधील शिवसेनेच्या दोघा माजी आमदारांनी भाजपमध्ये प्रवेश केलाय. विशेष म्हणजे देवेंद्र फडणवीसांच्या उपस्थितीत सेनेच्या दोघा माजी आमदारांचा भाजपात प्रवेश पार पडला. त्यामुळे चर्चांना उधाण आलंय. पालघरमधील शिवसेनेचे अमित घोडा आणि विलास तरे (Amit Ghoda and Vilas Tare) अशी भाजपात प्रवेश करणाऱ्या दोन नेत्यांची नावं आहेत.

शिवसेनेचे माजी आमदार अमित घोडा आणि एकनाथ शिंदे यांचे निकटवर्तीय म्हणून ओळखले जाणारे विलास तरे यांनी भाजपात प्रवेश केलाय. या दोन्ही शिवसेनेच्या माजी आमदारांनी देवेंद्र फडणवीस यांच्या उपस्थितीत बुधवारी भाजपात जाहीर प्रवेश केला.

कोण आहेत विलास तरे?

माजी आमदार असलेल्या या दोघांनीही पालघर जिल्ह्यात विधानसभा निवडणूक लढवली होती. त्यातील विलास तरे हे दोन वेळा आमदार म्हणून निवडून आले होते. 2009 आणि 2014 साली विलास तरे हे बहुजन विकास आघाडीकडून बोईसर विधानसभेवर निवडून आले होते. दरम्यान, 2019मध्ये निवडणुकीआधी तरे यांनी शिवसेनेत प्रवेश केला होता.

शिवसेनेच्या पालघरमधील अंतर्गत वादामुळे तरे यांचा पराभव झाला, असं बोललं जातं. बोईसर विधानसभा मतदारसंघातून 2019 साली निवडणूक लढवताना विलास तरे यांना हार पत्करावी लागली. तेव्हापासून तरे अस्वस्थ होते आणि ते शिंदे गटात जातील, अशी चर्चा सुरु होती.

कोण आहेत अमित घोडा?

दुसरीकडे शिवसेनेचे माजी आमदार अमित घोडा हे दिवंगत आमदार कृष्णा घोडा यांचे सुपुत्र आहे. ते 2016 साली झालेल्या पोटनिवडणुकीत शिवसेनेकडून पालघर विधानसभा मतदारसंघातून आमदार म्हणून निवडून आले होते. पण 2019 साली विधानसभा निवडणुकीसााठी त्यांना उमेदवारी नाकारण्यात आली होती.

अमित घोडा आणि विलास तरे यांची भाजपात प्रवेश केल्यानं पालघरमध्ये भाजपचं बळ वाढलंय. उपमुख्यमंत्री देवेंद्र फडणवीस यांच्या उपस्थितमध्ये त्यांनी भाजपमध्ये प्रवेश केलाय. पालिका निवडणुकांच्या आधी घडलेला हा पक्षप्रवेश मोठी राजकाय घडामोड मानला जातोय. या पक्षप्रवेशाने शिवसेनेसोबत शिंदे गटालाही धक्का दिल्याचं जाणकारांचं म्हणणंय.