शरद पवारांना पुन्हा मोठा हादरा? 3 दिवस नॉट रिचेबल असणारा माजी मंत्री भाजपच्या वाटेवर? राष्ट्रवादीत खळबळ
एकीकडे शिवसेना उद्धव बाळासाहेब ठाकरे यांच्या पक्षाचे सहा खासदार एकनाथ शिंदे यांनी फोडले असतानाच आता राष्ट्रवादी शरद पवार गटाचे माजी मंत्री हे गेल्या तीन दिवसांपासून मुख्यमंत्री देवेंद्र फडणवीस यांची भेट घेण्यास धडपडत असल्याचे वृत्त आल्याने राष्ट्रवादी पक्षात खळबळ उडाली आहे.
एकीकडे राज्यातील विरोधी पक्षातील अनेक नेत्यांना भाजपाने आपल्या किंवा सहकारी पक्षात समावेश करण्याचा सपाटा लावला असताना आता राष्ट्रवादी शरद पवार गटाचे बडे नेते गेल्या तीन दिवसांपासून मुख्यमंत्री देवेंद्र फडणवीस यांच्या भेटीसाठी प्रतिक्षेत असल्याचे उघडकीस आले आहे. बुलढाणा जिल्हा मध्यवर्ती सहकारी बँकेच्या कामाच्या निमित्ताने राजेंद्र शिंगणे हे मुख्यमंत्री देवेंद्र फडणवीस यांची भेट घेणार असल्याचे जरी बोलले जात असले तरी जिल्हा भर त्यांच्या भाजपातील प्रवेशांची चर्चा केली आहे.
राष्ट्रवादीचे नेते आणि माजी मंत्री डॉ.राजेंद्र शिंगणे हे गेल्या तीन दिवसांपासून मुख्यमंत्र्यांचे भेटीसाठी प्रतीक्षेत असल्याने जिल्हाभर त्यांच्या भाजपा प्रवेशाची चर्चा रंगली आहे. मात्र, बुलढाणा जिल्हा मध्यवर्ती सहकारी बँकेच्या कामाच्या निमित्ताने शिंगणे मुख्यमंत्री देवेंद्र फडणवीस यांची भेट घेण्याची माहिती त्यांच्या जवळचा लोकांनी दिली आहे. तर डॉ शिंगणे यांनी जिल्हा बँकेच्या संदर्भात मुख्यमंत्र्यांना भेटून पत्र देणार असल्याचे म्हटले आहे.
मी जिथे आहे तिथेच ठीक आहे
भाजप प्रवेशा संदर्भात माजी मंत्री डॉ. राजेंद्र शिंगणे यांना फोनवर संपर्क केला असता त्यांनी सांगितले की, मी जिथे आहे तिथेच ठीक आहे. त्यामुळे मी कुठेही भाजपमध्ये जाणार नाही. अशा प्रकारची भूमिका त्यांनी टीव्ही नाईन मराठीशी बोलताना स्पष्ट केली.ही वायफळ चर्चा कुणी सुरू केली मला माहिती नाही. मी एकनिष्ठ आहे. मुख्यमंत्र्यांना मी भेटण्यासाठी आलो ते जिल्हा बँकेच्या कामासाठी आलो आहे. बुलढाणा जिल्हा बँकेत ज्या जिल्ह्यातील शासकीय संस्था आहेत. त्या संस्थांचे व्यवहार बँकेमध्ये पुन्हा एकदा सुरळीत होण्यासाठी आपण पत्र घेऊन आलो होतो.
पुढील आठवड्यात पुन्हा मुंबईला येणार
या संस्थांमध्ये जिल्हा परिषद, पंचायत समिती आणि इतर शासकीय कार्यालये व्यवहार पुन्हा एकदा जिल्हा बँकेत सुरू करावीत, तसेच खत कारखान्याच्या परवाना नूतनीकरण संदर्भात फडणवीस यांना भेटण्यासाठी त्यांच्याकडे आलो होतो. मात्र त्यांची वेळ न मिळाल्यामुळे भेट होऊ शकली नसल्याचे त्यांनी सांगितले. दोन-तीन दिवसापासून मी त्यांच्या भेटीच्या प्रतीक्षेत आहे. पुन्हा एकदा पुढील आठवड्यात हेच पत्र घेऊन मी त्यांच्या भेटीसाठी मुंबईला जाणार आहे असेही त्यांनी टीव्ही नाईन मराठी बोलताना सांगितले.
