SambhajiRaje Chatrapati : संभाजीराजे छत्रपती अपक्षच लढणार, शिवसेनेच्या ऑफरनंतरही भूमिकेवर ठाम; आकेडवारीचं गणित कसं सुटणार?
संभाजीराजे यांना शिवसेनेकडून पक्ष प्रवेशाची आणि राज्यसभा उमेदवारीची ऑफर देण्यात आल्याची माहिती सूत्रांनी दिलीय. या ऑफरनंतरही संभाजीराजे छत्रपती हे अपक्ष निवडणूक लढण्याच्या भूमिकेवर ठाम आहेत.
मुंबई : महाराष्ट्रातील राज्यसभेचा 6 जागांसाठी निवडणूक (Rajya Sabha Election) होत आहे. राजकीय पक्षांच्या संख्याबळानुसार भाजपचे दोन, शिवसेना, राष्ट्रवादी आणि काँग्रेसचा प्रत्येकी एक उमेदवार निवडून येऊ शकतो. तर सहाव्या जागेसाठी संभाजीराजे छत्रपती (Sambhajiraje Chatrapati) यांनी अपक्ष लढणार असल्याचं जाहीर केलंय. सर्व राजकीय पक्षांकडे त्यांनी सहकार्याचं आवाहनही केलं आहे. त्यांच्या आवाहनाला राष्ट्रवादी काँग्रेसचे सर्वेसर्वा शरद पवार (Sharad Pawar) यांनी प्रतिसाद दिलाय. मात्र, शिवसेनेनं संभाजीराजेंच्या राज्यसभेच्या मार्गात खो घातल्याचं पाहायला मिळत आहे. कारण शिवसेनेकडून राज्यसभेसाठी दोन उमेदवार देणार असल्याची घोषणा करण्यात आलीय. इतकंच नाही तर संभाजीराजे यांना शिवसेनेकडून पक्ष प्रवेशाची आणि राज्यसभा उमेदवारीची ऑफर देण्यात आल्याची माहिती सूत्रांनी दिलीय. या ऑफरनंतरही संभाजीराजे छत्रपती हे अपक्ष निवडणूक लढण्याच्या भूमिकेवर ठाम आहेत.
संभाजीराजेंच्या राज्यसभेच्या मार्गात शिवसेनेचा खो
राज्यसभेच्या सहाव्या जागेसाठी आपण अपक्ष लढणार असल्याचं संभाजीराजे छत्रपती यांनी जाहीर केलं आहे. त्यानंतर त्यांनी सर्वपक्षीय नेत्यांना पाठिंबा देण्याचं आवाहनही केलं. त्यांच्या आवाहनानंतर शरद पवार यांनी राष्ट्रवादी काँग्रेसची शिल्लक राहिलेली मतं संभाजीराजेंना देण्यात येतील, असं जाहीर केलं. तर शिवसेनेकडून मात्र सहाव्या जागेसाठी उमेदवार देण्याची घोषणा करण्यात आली आहे. अशावेळी शिवसेनेनं संभाजीराजेंना राज्यसभेसाठी एक ऑफर दिल्याची माहिती सूत्रांकडून मिळत आहे. शनिवारी संभाजीराजे आणि उद्धव ठाकरे यांच्यात बैठक पार पडली. त्या बैठकीत संभाजीराजेंनी शिवसेनेत प्रवेश करावा, त्यानंतर पक्षाकडून त्यांना उमेदवारी देण्यात येईल, अशी अट घातल्याची माहिती मिळत आहे.
शिवसेना सहावा उमेदवार देणार
संभाजीराजे छत्रपती यांनी स्वराज्य संघटनेची स्थापना करत आपण राज्यसभेसाठी अपक्ष उभे राहणार असल्याचं जाहीर केलं. तसंच सर्व पक्षांनी पाठिंबा देऊन पाठवावं, असं आवाहनही त्यांनी केलं आहे. मात्र, संभाजीराजे यांची राज्यसभेसाठीची वाट खडतर असल्याचं पाहायला मिळत आहे. कारण शिवसेना सहाव्या जागेवर उमेदवार देणार असल्याचं अनिल परब यांनी स्पष्ट केलंय. त्यामुळे संभाजीराजेंचं दुसऱ्यांदा राज्यसभेवर जाण्याचं स्वप्न भंगण्याची शक्यता निर्माण झाली आहे.
राज्यसभेच्या संख्याबळाचं गणित कसं?
राज्यसभेची जागा जिंकण्यासाठी प्रत्येक उमेदवाराला 42 मतांची गरज आहे. भाजपकडे सध्या 113 आमदारांचं संख्याबळ आहे. त्यात भाजपचे 106, रासप 1, जनसुराज्य 1 आणि 5 अपक्षांचा समावेश आहे. तर महाविकास आघाडीकडे एकूण 169 आमदार आहेत. या संख्याबळानुसार भाजपचे दोन तर शिवसेना, काँग्रेस आणि राष्ट्रवादीचा प्रत्येकी एक उमेदवार निवडून येईल. तर सहाव्या जागेसाठी संभाजीराजे छत्रपती अपक्ष लढणार आहेत.
