मुंबईत गणेशविसर्जनाआधी राजकारण; शिवसेनेला डिवचण्यासाठी शिंदेगटाचे नेते मनसेच्या स्टेजवर

मुंबई : गणेश विसर्जना दरम्यान शिवसेना आणि शिंदे गट आमने सामने आल्याने राजकीय वातावरण तापले. अशातच मुंबईत एक राजकीय चमत्कार पाहायला मिळाला आहे.  शिवसेनेला डिवचण्यासाठी शिंदेगटाचे नेते मनसेच्या स्टेजवर दिसले. शिंदे गटाचे नेते सदा सरवणकर(Shinde group leader Sada Saravankar) हे मनसे नेते संतोष धुरी(MNS leader Santosh Dhuri) यांच्या व्यासपीठावर उपस्थित होते. यामुळे गणेश उत्सवाच्या निमित्ताने शिंदे गट आणि मनसे यांच्यातील जवळीक वाढताना दिसत आहे. यामुळे पुन्हा एकदा शिंदे गट आणि मनसे युतीच्या चर्चा रंगल्या आहेत. तर दुसरीकडे मुंबईत गणेशविसर्जनाआधी राजकारण सुरु झाले आहे.

गणेश विसर्जना दरम्यान दादरजवळील प्रभादेवी परिसरात प्रभादेवीमध्ये शिवसेना आणि शिंदे गटात राडा झाला. संजय भगत आणि समाधान सरवणकर यांच्यात आमना सामना झाला. समाधान सरवणकरांकडून म्याव म्यावच्या घोषणा देण्यात आल्या. यानंतर प्रभादेवी परिसरात पोलिस बंदोबस्त वाढवण्यात आला.

दुसरीकडे दादर परिसरात सदा सरवणकर मनसेच्या स्टेजवर दिसले. मनसे नेते संतोष धुरींसोबत सदा सरवणकर हे उपस्थित होते. या राजकीय योगायोगामुळे मनसे शिवसेना यांच्या युतीच्या चर्चेला उधाण आले आहे. गणेशोत्सवात हिंदुत्वाचा उत्साह पहायला मिळत आहे. हिंदुत्वाच्या मुद्द्यावर विसर्जनासाठी एकत्र आल्याचे सदा सरवणकर म्हणाले.

मुख्यमंत्री एकनाथ शिंदे राज ठाकरेंच्या निवासस्थानी गणरायाच्या दर्शनाला गेले होते. यानंतरच शिंदे गट आणि मनसे युतीच्या चर्चांना उधाण आले आहे. युतीचा निर्णय राज ठाकरे घेतील अशी प्रतिक्रिया मनसे नेते देत आहेत.

राज्यात भाजप आणि मनसे युतीची चर्चा सुरु असतानाच आता शिंदे गट आणि मनसे युती होईल अशा घडामोडी राज्यात घडताना दिसत आहेत. हिंदुत्वाच्या मुद्द्यावरुन भाजप मनसेची नेते युती होऊ शकते अशी चर्चा आहे.

तर, दुसरीकडे हिंदुत्वावरून एकमत होत असेल तर त्यात गैर काय ? असा प्रश्न शिंदे गटाचे नेते उपस्थित करत आहेत. मात्र, मनसे नेमकं कोणासह युती करणार? या प्रश्नाचे उत्तर आगामी राजकीय घडामोडींमधून मिळेल.