एकीकडे गुप्त बैठकीची चर्चा, दुसरीकडे स्वबळाचा नारा देणाऱ्या नाना पटोलेंची मोठी प्रतिक्रिया

मुंबई : एकीकडे शिवसेना खासदार संजय राऊत (Sanjay Raut) यांच्या गुप्त बैठकीचं वृत्त समोर आल्यानंतर, तिकडे स्वबळाची भाषा करणारे काँग्रेस प्रदेशाध्यक्ष नाना पटोले (Congress Nana Patole) यांनी आपली प्रतिक्रिया दिली आहे. “सरकार वाचवायचा प्रश्नच नाही आम्ही तिघेही सोबत आहोत. सरकार पाच वर्ष चालेल”, असं नाना पटोले यांनी ठणकावून सांगितलं. ते टीव्ही 9 मराठीशी बोलत होते. (Shiv Sena MP Sanjay Rauts secret meeting congress leader Nana Patole said, Government of Maharashtra will complete its term of five years )

सरकार वाचवण्यासाठी संजय राऊत यांच्या हालचाली सुरु असल्याचं कळतंय. मंगळवारी गुप्त बैठक झाली. या बैठकीला संजय राऊत, मिलिंद नार्वेकर, राष्ट्रवादीचे खासदार सुनील तटकरे, एकनाथ शिंदे या बैठकीला उपस्थित होते. या बैठकीबाबत बोलताना नाना पटोले म्हणाले, सरकार वाचवण्याचा वगैरे प्रश्नच येत नाही. हे सरकार पाच वर्ष चालणार आहे. आम्ही तिन्ही पक्ष एकत्र आहोत.

नितीन राऊत आणि माझ्यात भांडण लावण्याचा प्रयत्न 

दरम्यान, नाना पटोले यांनी ऊर्जा मंत्री नितीन राऊत यांच्या खात्यातील कथित घोटाळ्यावरही भाष्य केलं आहे. “मी कुठलेही पत्र ऊर्जाविभागाच्या विरोधात लिहिलेलं नाही. नागपूरच्या खणीकरण विकास महामंडळाने जे कोलवॉशिंगचे टेंडर काढले होते ते चुकीच्या पद्धतीने काढले होते. याबाबत मी मुख्यमंत्र्यांना पत्र लिहिले होते, यामध्ये ऊर्जा विभागाचा काही संबध नाही. कॉंग्रेसमध्ये आपआपसात भांडणे आहे असे दाखवण्याचा प्रयत्न झाला तो काही बरोबर नाही. खणीकरण महामंडळाचा विषय ऊर्जा विभागाचा आहे असे दाखवून नितीन राऊत आणि माझ्यात भांडण लावण्याचा प्रयत्न झाला ते चुकीचा आहे”

साखर कारखान्यांवर ईडीची धाडी

सरकारने ईडी आणि सीबीआयला पोपट केले आहे. दुसऱ्या पक्षांना घाबरवण्यासाठी अशा तपास यंत्रणांना हाताशी धरुन कारवाया करणे घातक आहे. अजित पवारांच्या सीबीआय चौकशीची मागणी करुन विधानसभा अध्यक्ष निवडणुकीत काही गोंधळ घालता येईल का याची चाचपणी केली जात आहे, असा आरोप नाना पटोले यांनी भाजपवर केला.

संजय राऊतांच्या गुप्त बैठकीची चर्चा

महाविकास आघाडीत सर्व काही आलबेल नसल्याच्या घडामोडी सातत्याने समोर येत आहेत. कारण शिवसेना खासदार संजय राऊत यांनी पक्षप्रमुख उद्धव ठाकरे, राष्ट्रवादीचे अध्यक्ष शरद पवार यांची भेट घेतल्यानंतर आता नवी माहिती समोर आली आहे. सरकार वाचवण्यासाठी संजय राऊत यांच्या हालचाली सुरु असल्याचं कळतंय. मंगळवारी गुप्त बैठक झाली. या बैठकीला संजय राऊत, उपमुख्यमंत्री अजित पवार, मिलिंद नार्वेकर, राष्ट्रवादीचे खासदार सुनील तटकरे, एकनाथ शिंदे या बैठकीला उपस्थित होते.

संबंधित बातम्या 

सरकार वाचवण्यासाठी हालचाली, संजय राऊत यांची गुप्त बैठक, कोण कोण उपस्थित?

शिवसेनेकडील खनिकर्म महामंडळाच्या निविदा प्रक्रियेवर काँग्रेसचा आक्षेप, नाना पटोलेंचं मुख्यमंत्र्यांना पत्र