Eknath Shinde : एकनाथ शिंदेंच्या बंडात कोण कोण शिवसेना आमदार? हे 13 आमदारही नॉट रिचेबल
Eknath Shinde : विधान परिषद निवडणुकीसाठी मतदान झाल्यानंतर संध्याकाळी 5 वाजताच्या सुमारास एकनाथ शिंदे 13 आमदारांना घेऊन सुरतला गेल्याचं सांगितलं जातं. शिंदे हे 13 आमदारांसह कारने सुरतला गेले.
मुंबई: विधान परिषदेची निवडणूक (vidhan parishad election) पार पडताच राज्याचे नगरविकास मंत्री आणि शिवसेनेचे नेते एकनाथ शिंदे (eknath shinde) हे कालपासून नॉट रिचेबल आहेत. त्यांच्यासोबत एकूण 13 आमदार असल्याचं सांगितलं जात आहे. एकनाथ शिंदे यांनी ठाकरे सरकारविरोधात बंड केल्याचं सांगितलं जात आहे. 13 आमदारांना घेऊन शिंदे यांनी सुरत गाठल्याचं सांगितलं जात आहे. शिंदे ज्या ला मेरेडियन हॉटेलात थांबले आहेत, त्या हॉटेलबाहेर मोठा पोलीस बंदोबस्त ठेवण्यात आला आहे. शिंदे यांच्यासोबत कोकण, ठाणे आणि औरंगाबादमधील सहा आमदार नॉट रिचेबल आहेत. दोन विद्यमान मंत्र्यांसोबत शिंदे हे सुरतला आले असून आज दुपारी ते आपली भूमिका स्पष्ट करणार आहेत. त्यामुळे आज ठाकरे सरकार संकटात सापडल्याचं सांगितलं जात आहे. शिंदे हे आपल्या समर्थक आमदारांसोबत भाजपमध्ये (bjp) प्रवेश करणार असल्याचं सांगितलं जात आहे. त्यामुळे शिंदे यांच्या पत्रकार परिषदेकडे सर्वांचं लक्ष लागलं आहे.
विधान परिषद निवडणुकीसाठी मतदान झाल्यानंतर संध्याकाळी 5 वाजताच्या सुमारास एकनाथ शिंदे 13 आमदारांना घेऊन सुरतला गेल्याचं सांगितलं जातं. शिंदे हे 13 आमदारांसह कारने सुरतला गेले. सुरत विमानतळाजवळच्या ला मेरेडियन हॉटेलमध्ये शिंदे या आमदारांना घेऊन उतरल्याचं सांगितलं जात आहे. शिंदे यांनी हॉटेल गाठल्यानंतर या हॉटेलात मोठा बंदोबस्त ठेवण्यात आला आहे. या हॉटेलबाहेर पहिल्यांदाच एवढा मोठा पोलीस बंदोबस्त ठेवण्यात आला आहे. सुरत गुन्हे अन्वेषण विभागाचे पोलीस शिंदे यांच्या हालचालींवर लक्ष ठेवून असल्याचं सांगितलं जात आहे.
नॉट रिचेबल आमदार
शहाजी बापू पाटील महेश शिंदे सातारा भरत गोगावले महेंद्र दळवी महेश थोरवे विश्वनाथ भोईर शांताराम मोरे संजय राठोड संदीपान भुमरे उदयसिंह राजपूत संजय शिरसाठ रमेश बोरणारे प्रदीप जैस्वाल अब्दुल सत्तार
शरद पवारांची बैठक
दरम्यान, ठाकरे सरकारवर आलेल्या संकटाच्या पार्श्वभूमीवर राष्ट्रवादीचे सर्वेसर्वा शरद पवार यांनी तातडीने बैठक बोलावली आहे. या बैठकीत ठाकरे सरकार अडचणीत आल्यास काय भूमिका घ्यायची यावर चर्चा होणार आहे. स्वत: शरद पवार या बैठकीत भाग घेणार असल्याचं सांगितलं जात आहे.
खासदारांना मुंबईत बोलावलं
एकनाथ शिंदे यांच्या बंडाच्या पार्श्वभूमीवर शिवसेनेने सर्व खासदारांना मुंबईत बोलावलं आहे. मुख्यमंत्री उद्धव ठाकरे यांनी शिवसेना नेत्यांची एक बैठक बोलावली आहे. त्यात पुढची रणनीती ठरवली जाणार आहे.
