‘सिद्धिविनायक पाप करणाऱ्यांना…’ संजय राऊतांचा खोचक टोला, म्हणाले ‘एकनाथ शिंदे, अजित पवारांनी…’

Sanjay Raut Target Ajit Pawar : राष्ट्रवादी काँग्रेसचे नेते आणि उपमुख्यमंत्री अजित पवार यांनी मुंबईतील सिद्धिविनायक मंदिरातील गणपती बाप्पाचे दर्शन घेतले. यावेळी अजित पवारांसोबत पक्षाचे खासदार, आमदार, मंत्री व पदाधिकारी श्री सिध्दिविनायकाच्या दर्शनासाठी उपस्थित होते. राष्ट्रवादी काँग्रेसने सिध्दिविनायकाच्या दर्शनाने विधानसभा प्रचाराचा नारळ फोडला आहे. अजित पवारांनी सिद्धिविनायक मंदिरातील बाप्पाचे दर्शन घेतल्यानंतर त्यांना बाप्पाची प्रतिकृती सदिच्छा भेट म्हणून देण्यात आली. यावर शिवसेना खासदार संजय राऊत यांनी अजित पवारांवर जोरदार निशाणा साधला.

शिवसेना खासदार संजय राऊतांनी नुकतंच प्रसारमाध्यमांशी संवाद साधला. यावेळी त्यांनी अनेक राजकीय विषयांवर भाष्य केले. यावेळी संजय राऊतांना अजित पवारांच्या सिद्धिविनायक दर्शनाबद्दल विचारणा करण्यात आली. त्यावर त्यांनी अजित पवारांना खोचक टोला लगावला.

“सिद्धिविनायकाला पाप पुण्य समजतं”

“जे सिद्धिविनायकाचं दर्शन घेत आहेत. ती चांगली गोष्ट आहे. सिद्धिविनायकाला पाप पुण्य समजतं. पुण्य कोण करतंय आणि पाप कोण करतंय या सर्व गोष्टी समजतात. चोऱ्या लबाड्या कोण करतंय, कोण माझ्या दारात पुण्यात्म व्हायला येतेय, हे देखील सिद्धिविनायकाला कळतं”, असं संजय राऊत म्हणाले.

“कोणालाही आशीर्वाद देत नाही”

“ज्या प्रकारचं पाप एकनाथ शिंदे, अजित पवार यांनी महाराष्ट्राच्या बाबतीत केलं आहे. सिद्धिविनायक अशाप्रकारे कोणालाही आशीर्वाद देत नाही”, असेही संजय राऊतांनी सांगितले.

यानंतर संजय राऊतांनी वरळीतील हिट अँड रन प्रकरणीही वक्तव्य केले. हिट अँड रन केस मधील मुख्य आरोपी त्याचा मुलगा यांचे मुख्यमंत्री एकनाथ शिंदे यांच्याशी अतिशय घनिष्ठ संबंध आहेत. माझ्या माहितीप्रमाणे त्यांचे व्यावसायिक संबंध आहेत ते ठाणे जिल्ह्यातील आहेत. त्यांच्या पक्षाचे ते उपनेते आहेत. दारुच्या नशेत एका मराठी महिलेला गाडीखाली चिरडून हा मिहीर शहा मुंबई पोलिसांच्या हातून सुटतो कसा, कुठे गेला आहे तो? सुरतला गेला आहे की गुहाटीला लपवला आहे. त्याला याचा खुलासा मुख्यमंत्र्यांनी आणि देवेंद्र फडणवीस यांनी करावा, असेही संजय राऊत म्हणाले.

अजित पवारांसह सर्व आमदारांचे सिद्धिविनायक दर्शन

दरम्यान अजित पवारांनी सिद्धिविनायकाचे दर्शन घेऊन प्रतिक्रिया दिली. मंगळवार असल्याने आज आम्ही सर्वांनी दर्शन घ्यायचं, असं ठरवलं होतं. त्यानुसार आम्ही येऊन दर्शन घेतलं. आपण नेहमीच चांगल्या कामाची सुरुवात देवदर्शन करुन करतो. आम्ही आता जनतेच्या समोर जाणार आहोत, त्यासाठी जनतेने आम्हाला आशीर्वाद द्यावे, सिद्धिविनायकाने आशीर्वाद द्यावे हेच साकडं सिद्धिविनायकाला घातले. आम्ही लोकांचा विश्वास संपादन करण्यासाठी पुन्हा एकदा त्यांच्या समोर जाणार आहोत. याची सुरुवात चांगल्या दिवशी केली जाते. तो चांगला दिवस आज नेमका आला आहे, असे अजित पवार म्हणाले.