आत्मचरित्रानंतर भाजपचे सोनिया गांधींना तीन सवाल, बाबरी ढाचा, राम मंदिर ते बाटला हाऊस; सगळंच काढलं
Sonia gandhi autobiography : सोनिया गांधी यांच्या आत्मचरित्रावरुन सध्या राजकीय वर्तुळात अनेक चर्चांना उधाण आलेलं आहे. या पुस्तकावरुन आता गांधींवर भाजपच्या आमदारांनी या पुस्तकावर सडकून टीका केली आहे.
सोनिया गांधी यांच्या आत्मचरित्रावरून भाजप खासदार डॉ. अनिल बोंडे यांनी काँग्रेसवर टीका केली आहे. बाटला हाऊस चकमकीचा दाखला देत त्यांनी सोनिया गांधींवर गंभीर आरोप केले. राम मंदिर आणि बाबरी ढाच्याबाबतही त्यांनी विधान केलं आहे. ते अमरावतीत बोलत होते. बाटला हाऊस चकमकीत अतिरेकी मारले गेले तेव्हा सोनिया गांधींच्या डोळ्यात अश्रू आले. पण पोलीस अधिकारी मारले गेले तेव्हा कळवळा आला नाही असं खासदार अनिल बोंडे म्हणाले आहेत.
देशविरोधी आणि आक्रमकांच्या बाजूने राहायचा हाच काँग्रेसचा अजेंडा असल्याचं म्हणत भाजप खासदार डॉ. अनिल बोंडे यांनी सोनिया गांधींच्या आत्मचरित्रावरून टीकास्र डागलं आहे. काँग्रेस नेत्या सोनिया गांधी यांच्या नुकत्याच प्रकाशित झालेल्या आत्मचरित्रावरून भाजपचे आक्रमक खासदार डॉ. अनिल बोंडे यांनी काँग्रेसवर आणि सोनिया गांधींवर तोफ डागली. राम लल्ला इतके दिवस झोपडीत राहिले तेव्हा त्यांच्या मनात काही आले नाही, मात्र गुलामीचे प्रतीक असलेला बाबरीचा ढाचा जेव्हा कारसेवकांनी पाडला, तेव्हा त्यांना अभिमान वाटायला हवा होता, असा सवाल डॉ. बोंडे यांनी उपस्थित केला आहे.
बाटला हाऊसमध्ये अतिरेकी मारले गेल्यानंतर त्यांच्या डोळ्यात अश्रू येतात, परंतु कर्तव्य बजावताना पोलीस निरीक्षक शर्मा यांना वीरमरण आले तेव्हा त्यांच्या मनात कळवळा आला नाही, असा घणाघात बोंडे यांनी केला आहे. केवळ मुस्लिमांचे लांगुलचालन करण्यासाठी आणि मतांचे राजकारण करण्यासाठीच हे सर्व घडत असून, परक्यांच्या आक्रमणाबाबत आणि देशविरोधी शक्तींच्या बाजूने उभे राहण्याचा हा काँग्रेसचा जुनाच अजेंडा असल्याची टीका खासदार अनिल बोंडे यांनी केली आहे, असं डॉ.अनिल बोंडे म्हणाले आहेत.
दरम्यान, सोनिया गांधी यांचे आत्मचरित्र ‘बिलाँगिंग : अ जर्नी ऑफ लव्ह’ (Belonging: A Journey of Love) हे आत्मचरित्र नुकतेच प्रकाशित झाले आहे. यामध्ये त्यांचे खाजगी आयुष्य आणि आणि त्यांचा जीवन प्रवास उलगडण्यात आला आहे. हे पुस्तक प्रामुख्याने त्यांच्या वैयक्तिक आयुष्यावर, इटलीमधील सामान्य कुटुंबातून येऊन भारतातील सर्वात प्रभावी राजकीय कुटुंबाचा (नेहरू-गांधी कुटुंब) भाग बनण्याच्या प्रवासावर आधारित आहे. त्यांनी याला पूर्णपणे राजकीय पुस्तक न म्हणता खाजगी आयुष्याची कहाणी म्हटलं आहे.
