माझं राज्य दुष्काळात, अंगावर गुलाल घेणार नाही : उदयनराजे

सातारा : सातारा लोकसभा मतदारसंघात राष्ट्रवादीचे उमेदवार उदयनराजे भोसले यांचा विजय झाला. शिवसेनेचे उमेदवार आणि माथाडी कामगारांचे नेते नरेंद्र पाटील यांचा उदयनराजे भोसले यांनी मोठ्या फरकाने पराभव केला. मात्र, विजयाने हुरळून न जाता, उदयनराजे भोसलेंनी खऱ्या अर्थाने ‘जनतेचे राजे’ असल्याचं दाखवून दिलं. विजयानंतर गुलाल उधळून, वाजत-गाजत जल्लोष साजरा करण्याला उदयनराजेंनी विरोध केला आणि म्हणाले, “माझं राज्य दुष्काळात, मी विजयाचा गुलाल अंगावर घेणार नाही.”

काय म्हणाले उदयनराजे?

“साताऱ्ययात खासदार उदयनराजे भोसले यांनी विजयाची हॅटट्रिक साधली. या विजयानंतर खासदार उदयनराजे भोसले यांनी माध्यमांशी संवाद साधला. “विजयाचं श्रेय सर्व सातारकरांना देतो. मात्र, विजयाचा जल्लोष साजरा करणार नाही. कारण माझं राज्य दुष्काळात आहे. महाराष्ट्रात प्रचंड  दुष्काळी परिस्थिती आहे. त्यामुळे गुलाल उधळून जल्लोष करणार नाही.” असे उदयनराजे म्हणाले.

सध्या राज्यात दुष्काळपरिस्थीती आहे. अनेकजन दुष्काळात होरपळतायत. दुष्काळावर मी थोड्या दिवसातच काम करणार आहे, असे आश्वासन उदयनराजे भोसलेंनी दिलं. तसेच, दुष्काळी परिस्थितीमुळे मी विजयाची मिरवणूक काढणार नाही. मी हार गुच्छ स्वीकारणार नाही, मी गुलाल लावून घेणार नाही, असेही उदयनराजेंनी जाहीर केले.

“माझ्या कामात काही चुका होत असतात, त्या मला लोकांनी दाखवून द्याव्यात, त्या मी चुका वेळीच सुधारेन.” असे उदयनराजेंनी जनतेला आवाहन केले.

माझं राज्य दुष्काळात. मी विजयाचा गुलाल अंगावर घेणार नाही. – श्रीमंत छत्रपती उदयनराजे भोसले. pic.twitter.com/bVpxxMjz6M

— Chhatrapati Udayanraje Bhonsle (@Chh_Udayanraje) May 23, 2019

तसेच, विजयानंतर उदयनराजे काहीशे भावूक झाले आणि जुन्या आठणींना उजाळा दिला. ते म्हणाले, “माझ्या कमी वयात मी जावलीचा आमदार झालो असतो. सर्वात कमी वयाचा मी आमदार झालो असतो. परंतु घरगुती शब्दामुळे म्हणजे आमच्या आजी सुमित्राराजे यांच्या शब्दामुळे मी निवडणूक लढवली नव्हती.”