जनता नारायण राणेंना लवकरच त्यांची जागा दाखवेल; शिवसेनेचा पलटवार

रत्नागिरी : “नारायण राणे हे राज्याचे मुख्यमंत्री राहिलेले आहेत. त्यांनी राज्याच्या मुख्यमंत्रिपदावर बसलेल्या व्यक्तीला उद्देशून वापरलेले शब्द न शोभणारे आहेत. जनता त्यांना नक्कीच त्यांची जागा दाखवेल” असा पलटवार शिवसेनेचे खासदार विनायक राऊत यांनी नारायण राणेंवर केला. भाजप नेते नारायण राणे यांनी पत्रकार परिषदेत मुख्यमंत्री उद्धव ठाकरे यांचा एकेरी उल्लेख केला. त्यानंतर राऊत यांनी माध्यमांना ही प्रतिक्रिया दिली. (Vinayak Raut slams Narayan Rane said people will soon show him his place)

यावेळी बोलताना राऊत म्हणाले, “पावसाळा संपला असला तरी या बेडकांची डरावगिरी संपलेली नाही. पण त्यांच्या डरावगिरीला कोणी घाबरत नाही. नारायण राणेदेखील कधीकाळी राज्याचे मुख्यमंत्री राहिलेले आहेत. त्यांनी मुख्यमंत्रिपदावर असलेल्या व्यक्तीला उद्देशून वापरलेले शब्द न शोभणारे आहेत. त्यामुळे येणाऱ्या दिवसात जनताच त्यांना त्यांची जागा दाखवेल.”

दरम्यान, शिवसेना आणि खासदार नारायण राणे यांच्यातला वाद शिगेला पोहोचलाय. दसरा मेळाव्यातून शिवसेना पक्षप्रमुख उद्धव ठाकरे यांनी नारायण राणे यांच्यावर प्रहार केला होता. शिवसेनेच्या टीकेला उत्तर म्हणून नारायण राणे यांनी मुंबईत सोमवारी (26 ऑक्टोबर) पत्रकार परिषदेत उद्धव ठाकरेंवर सडकून टीका केली. त्यानंतर नारायण राणेंच्या टीकेला शिवसेनेनेही चोख उत्तर दिलंय.

नारायण राणे काय म्हणाले ?

“मुख्यमंत्रिपदावर बसल्यापासून एकही काम उद्धव ठाकरे यांनी नीट केलं नाही. यांना जीडीपी कळत नाही, अर्थव्यवस्था माहिती नाही. अधिकारी हसतात. महाराष्ट्रासारख्या प्रगत राज्यात बुद्धू मुख्यमंत्री बसला आहे. असं नारायण राणे म्हणाले. तसेच, कोरोनाच्या काळात उद्धव ठाकरे पिंजऱ्यात होते. आत्ता कुठे एका दौऱ्याला ते बाहेर पडले. हे स्वतःला वाघ म्हणतात. हे पिंजऱ्यातील वाघ आहेत का? कालच्या सभेत केवळ 47 लोक टाळ्या वाजवायला होते. मी शिवसेनेत होतो, अनेक पदं भुषवली. बाळासाहेब ठाकरे यांनी मला अनेक पदं दिली. मी बेडूक नव्हतो. हे बेडूक आहेत म्हणून त्यांना बाळासाहेबांनी मुख्यमंत्री केलं नाही. बाळासाहेब असते तर त्यांना मुख्यमंत्री केलं नसतं. ते जास्त बोलले तर 47 वर्षात जे केलं ते सर्व बाहेर काढेल, असंही राणे म्हणाले.

संबंधित बातम्या : 

उद्धव ठाकरे यांची मुख्यमंत्रीपदी राहण्याची लायकी नाही, नारायण राणेंचा हल्लाबोल

दादागिरी केली तर ‘मातोश्री’च्या आतलं-बाहेरचं सगळं बाहेर काढेन : नारायण राणे

आज स्पष्ट बोलतोय, सुशांतची आत्महत्या नव्हे तर खून, आदित्य ठाकरे जेलमध्ये जातील : नारायण राणे

(Vinayak Raut slams Narayan Rane said people will soon show him his place)