समित कदमला Y दर्जाची सुरक्षा देण्याचे कारण काय? अनिल देशमुखांचा सवाल

Anil deshmukh on Samit kadam Y security : “ईडीच्या कारवाईपासून वाचवण्यासाठी देवेंद्र फडणवीसांनी यांनी मला एक प्रस्ताव दिला होता. मात्र मी तो नाकारला. हा प्रस्ताव घेऊन एक व्यक्ती माझ्याकडे आली होती. त्या व्यक्तीचे नाव समित कदम असे होते”, असे वक्तव्य राष्ट्रवादी शरद पवार गटाचे नेते अनिल देशमुख यांनी केले. यावर आता अनिल देशमुख यांनी एक पत्रकार परिषद घेतली. या पत्रकार परिषदेत अनिल देशमुख यांनी समित कदमवर गंभीर आरोप केले.

तीन वर्षांपूर्वी जेव्हा देवेंद्र फडणवीस यांनी मिरजचे समित कदम यांना माझ्याकडे पाच-सहा वेळा पाठवले. एकदा ते माझ्याकडे सील केलेले पाकिट घेऊन आले. त्याने मला सांगितलं की याचं तुम्ही प्रतिज्ञापत्र करुन द्या. त्यात लिहिलं होतं की उद्धव ठाकरे, आदित्य ठाकरे, अजित पवार यांसह अनेक नेत्यांवर मी खोटे आरोप करायचे. त्या खोट्या आरोपाचे मी प्रतिज्ञापत्र करुन द्यायचं. माझ्याकडे ते पाकिट आणून देणारा तो माणूस म्हणजे समित कदम. तो मिरजचा आहे, असे अनिल देशमुख म्हणाले.

समित कदम आणि देवेंद्र फडणवीसांचे घरगुती संबंध

समित कदम आणि देवेंद्र फडणवीस यांचे अतिशय जवळचे संबंध आहेत. त्यांनी अनेकदा देवेंद्र फडणवीसांची भेट घेतली आहे. त्यांचे फोटोही सोशल मीडियावर उपलब्ध आहेत. समित कदम आणि देवेंद्र फडणवीस यांचे अगदी घरगुती संबंध आहेत. समित कदम यांची पत्नी देवेंद्र फडणवीस यांना राखी बांधतानाही फोटो पाहायला मिळत आहे, असे अनिल देशमुखांनी सांगितलं.

“तो नगरसेवकही नाही”

“समित कदम हा अतिशय साधा कार्यकर्ता आहे. तो नगरसेवकही नाही. देवेंद्र फडणवीसांनी समित कदमला Y स्वरुपाची सुरक्षा दिली आहे. जर तुम्ही मिरज, सांगली या भागात चौकशी केली तर कोणीही तुम्हाला सांगेल की देवेंद्र फडणवीस आणि समित कदम यांचे काय संबंध आहेत याची माहिती कोणीही देईल”, असेही अनिल देशमुख यावेळी म्हणाले.