Chardham Yatra: चारधाम यात्रेचा नवीन नियम, भाविकांकडून नोंदणी शुल्क घेणार? कधीपासून लागू नियम?

Chardham Yatra Registration Fee: चारधाम यात्रा 19 एप्रिलपासून सुरू होत आहे. चारधाम यात्रेच्या नोंदणी प्रक्रियेत यंदा बदल होणार आहे. बोगस नोंदणीला आळा घालण्यासाठी एक किमान नोंदणी शुल्क आकारले जाणार आहे. अर्थात याविषयीचा प्रस्ताव उत्तराखंड प्रशासनासमोर आहे. सरकार या नोंदणी शुल्काविषयी निर्णय घेण्याची शक्यता आहे.  एक दोन दिवसात चारधाम यात्रेसाठीची नोंदणी सुरू होणार आहे. देशभरातील लाखो भाविकांसाठी मोठी अपडेट काय आहे?

सोमवारी ऋषिकेशमध्ये गढवाल प्रशासन, हॉटेल मालक, टूर अँड ट्रॅव्हल ऑपरेटर्स, इतर व्यावसायिक यांच्यात एक बैठक झाली. हॉटेल असोसिएशन, टुरिझम इंडस्ट्रीजच्या प्रतिनिधींनी बोगस नोंदणीविरोधात आवाज उठवला. याप्रकाराला आळा घालण्यासाठी चारधाम यात्रेच्या नोंदणीसाठी कमीत कमी शुल्क आकारले जावे असा प्रस्ताव या बैठकीत समोर आला. गढवालचे आयुक्त विनय शंकर पांडे यांनी सांगितले की हा प्रस्ताव सर्वांकडून आला आहे आणि तो सरकारकडे पाठवण्यात आला आहे.

बोगस नोंदणीमुळे व्यावसायिकांना फटका

मोठ्या संख्येने देशभरातून लोक चारधाम यात्रेसाठी नोंदणी करतात. पण हे भाविक टूर अँड ट्रॅव्हल कंपन्यांपर्यंत पोहचत नाहीत. हॉटेलपर्यंत येत नाहीत. त्यामुळे व्यावासायिकांचं मोठं नुकसान होत असल्याची ओरड या बैठकीत करण्यात आली. भाविक मोठ्या संख्येने गर्दी करतात. पण योग्य आकडा उपलब्ध नसल्याने व्यावसायिकांची गुंतवणूक खर्चही निघत नाही असा दावा व्यावसायिकांनी केला आहे.

गेल्यावेळी 7.2 लाख भाविकांची नोंदणी

गेल्या वर्षी 7.2 दशलक्ष भाविकांनी चारधाम यात्रेसाठी नोंदणी केली होती. पण यात्रेत केवळ 5.2 दशलक्ष भाविक आले होते. भाविकांची ही मोठी संख्या अचानक गायब झाल्याने स्थानिक व्यावसायिक आणि प्रशासनाने चिंता व्यक्त केली आहे. नोंदणी मोठ्या संख्येने होते, पण भाविक तितक्या संख्येने येत नसल्याचे या बैठकीत समोर आणण्यात आले. जर बोगस एंट्री कमी झाली तर हॉटेल व्यावसायिक आणि इतरांचे मोठे नुकसान वाचेल असे म्हणणे मांडण्यात आले.

चार धाम मंदिर उघडण्याच्या तारखा

19 एप्रिल रोजी गंगोत्री आणि यमुनोत्री मंदिर उघडणार

22 एप्रिल रोजी केदारनाथ मंदिर उघाडणार

23 एप्रिल रोजी बद्रीनाथ मंदिर उघडणार