Pitru Paksha 2026: ‘त्याने वडिलांना पाण्यासाठी तडपवलं…’; पितृपक्षाच्या निमित्ताने CM योगी यांनी सांगितला हा किस्सा

योगी आदित्यनाथ

पितृ पक्ष हा केवळ पूर्वजांचे स्मरण करण्याचा काळ नाही, तर त्यांच्या त्यागातून मिळालेली मूल्ये पुढच्या पिढीपर्यंत पोहोचवण्याची आठवण करून देणारा काळ आहे. याच निमित्ताने उत्तर प्रदेशचे मुख्यमंत्री योगी आदित्यनाथ यांनी राज्यातील जनतेला पत्र लिहून पूर्वजांप्रती आदर, कुटुंबातील ज्येष्ठांचा सन्मान आणि आपल्या परंपरांचे जतन करण्याचे आवाहन केले. यावेळी त्यांनी मुघल बादशहा औरंगजेब आणि त्याचे वडील शाहजहान यांच्याशी संबंधित एका प्रसंगाचा उल्लेख केला. योगी आदित्यनाथ यांनी आपल्या संदेशात पितृ पक्षाला ‘भूतकाळाला भविष्याशी जोडणारी जीवनदृष्टी’ असे संबोधले. आपल्या पूर्वजांनी केलेले तप, त्याग आणि योगदान लक्षात ठेवणे तसेच त्यांनी दिलेली संस्कृती आणि मूल्ये पुढच्या पिढीपर्यंत पोहोचवणे ही आपली जबाबदारी असल्याचे त्यांनी म्हटले. पितृ पक्षात पूर्वजांचे स्मरण करताना केवळ विधी न करता त्यांच्या संस्कारांचे आचरण करण्याचा संदेशही त्यांनी दिला.

योगींनी सांगितला शाहजहान-औरंगजेबचा प्रसंग

योगी आदित्यनाथ यांनी आपल्या पत्रात आग्रा किल्ल्यात कैद असलेल्या शाहजहानचा आणि औरंगजेबाचा प्रसंग सांगितला. योगींच्या म्हणण्यानुसार औरंगजेबाने आपल्या जिवंत वडिलांना पाण्यासाठीही तडपवले होते. याच घटनेचा संदर्भ देताना योगींनी सनातन परंपरेतील पूर्वजांप्रती असलेल्या श्रद्धेचे महत्त्व अधोरेखित केले. त्यांनी सांगितले की, या प्रसंगाच्या संदर्भात शाहजहानने सनातन परंपरेचा उल्लेख करत ‘येथे तर मृत व्यक्तींनाही जल अर्पण केले जाते’, असा आशय व्यक्त केला होता.

पूर्वजांचे स्मरण आणि कुटुंबातील ज्येष्ठांचा सन्मान

योगी आदित्यनाथ यांनी पितृ पक्षाच्या निमित्ताने घरातील ज्येष्ठांचा सन्मान करण्याचे आवाहन केले. त्यांच्या मते, मागील पिढ्यांनी आपल्याला दिलेली संस्कृती, परंपरा आणि मूल्ये जपणे ही प्रत्येकाची जबाबदारी आहे. केवळ पूर्वजांना आठवणे नव्हे, तर त्यांच्या चांगल्या मूल्यांना आपल्या आचरणात उतरवणे गरजेचे आहे.

‘वारसा फक्त आठवू नका, आचरणात आणा’

पितृ पक्षाचा धार्मिक संदर्भ देताना योगींनी वारसा जपण्यावर विशेष भर दिला. मागील पिढ्यांकडून मिळालेली समृद्ध परंपरा पुढच्या पिढीपर्यंत पोहोचवताना ती आणखी समृद्ध करण्याचा प्रयत्न केला पाहिजे, असे त्यांनी म्हटले. यामध्ये संस्कार, कुटुंबातील नातेसंबंध आणि पूर्वजांप्रती कृतज्ञता यांना महत्त्व असल्याचे त्यांनी अधोरेखित केले.

यंदा पितृ पक्ष २७ सप्टेंबर ते १० ऑक्टोबर दरम्यान आहे. या काळात हिंदू धर्म परंपरेनुसार पूर्वजांचे स्मरण करून श्राद्ध, तर्पण आणि पिंडदान केले जाते. पितृ पक्ष हा श्रद्धा, कृतज्ञता आणि आपल्या मुळांशी जोडले जाण्याचा काळ मानला जातो.